Padre Ilídio Correia. Imajen/Facebook

DILI, 19 outubru 2020 (TATOLI)–Vigáriu Provinsiál ba Kongregasaun Salesiana Don Bosco iha Timor-Leste, Pe. Apolinario Neto, SDB, hateten família no kongregasaun Salesiana lakon maun no belun salesiano di’ak ida tanba Padre Ilídio Correia nu’udar ema ida-ne’ebe mak prontu nafatin atu serbi kongresaun salesiano no kongregasaun prepara atu serbi di’ak liután iha provinsiál Timor-Leste no serbi igreja iha mundu.

Notísia Relevante: Don Virgílio: “Kongregasaun Salesiana no Igreja Katólika lakon figura di’ak”

“Ohin, ita familia salesiana esperiénsia Mistériu Dolorozu ka Mistériu Terus nian tanba ita lakon ona ita-nia maun, alin, aman Pe. Ilídio Correia, SDB, iha moris ida-ne’e. Ita sente lakon figura ida-ne’ebé kongregasaun prepara atu serbi di’ak liután iha ita-nia provinsiál salesiana iha Timor no iha mundu maibé Maromak ninia planu oin seluk ba amu Ilídio Correia, SDB,” dehan Pe. Apolinario Neto, SDB, liuhosi ninia omília bainhira preside misa despedida ho família salesiana iha kapela Don Bosco, Comoro, Díli, segunda ne’e.

Misa Despedida ba Pe. Ilídio Correia, SDB, nia isin-mate iha Kapela Don Bosco, Comoro, Dili. Imajen TATOLI/Domingos Piedade Freitas.

Nia dehan, amu Ilidío Correia fó hela ezemplu ba família salesiana hotu katak importante tebes ba ema ida-idak atu fiel ba ema ida-idak nia vokasaun no moris nu’udar sarani no vokasaun nu’udar relijiozu no relijioza iha mundu ida-ne’e.

“Semana kotuk liu ba, ha’u ba vizita uma komunidade Casa Pos Noviciado, Dom Bosco, Comoro, Pe. Ilídio Correia hatudu nafatin ninia serenidade, ksolok, simplisidade, kalma no hala’o ninia kna’ar nu’udar Diretor ba Komuniade Casa Pos Noviciado hodi tau matan ba irmaun sira ne’ebé mak hili vokasaun atu sai nailulik,” nia hateten.

Notísia Relevante: Mate isin Padre Ilídio Correia sei haloot iha Fatumaca

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here