Sekretáriu Jerál Partidu FRETILIN, Marí Alkatiri. Imajen Tatoli/António Gonçalves

DILI, 19 outubru 2020 (TATOLI)–Sekretariadu Nasionál Komité Sentrál Frente Revolusionária Timor-Leste Indepedente (CCF-sigla Portugés), fó formasaun polítika patriótika FRETILIN nian ba militante, kuadru no simpatizante-sira kona-ba oinsá atu hatene loloos istória hosi FRETILIN nian.

“Objetivu hosi formasaun ida-ne’e hanesan prosesu ida ba fasilitadór-sira kona-ba formasaun polítika patriótika FRETILIN nian ba militante-sira ne’ebé mak bele hatene istória loloos hosi FRETILIN,” Sekretáriu Jerál Partidu FRETILIN, Marí Alkatiri, dehan ba jornalista-sira iha Sede Sekretariadu Nasionál Komité Sentrál FRETILIN, Comoro, Dili, segunda ne’e.

Formasaun ne’e, nia hateten, bainhira sira filafali ba sira-nia munisípiu bele halo esklaresimentu kona-ba FRETILIN nia abut ne’e maihosi ne’ebé tanba FRETILIN ho nia prinsípiu ida katak serbí ba povu no hasai povu hosi mukit.

Tanba ne’e, nia husu ba militante-sira katak bainhira tuir formasaun labele nonook no rona de’it maibé presiza mós tenke halo peskiza ba livru-sira atu nune’e bele hatene loloos istória FRETILIN no funu nian.

“Bainhira ita ko’alia kona-ba formasaun polítika husu ba ita-nia an rasik, sá prinsípiu, valór, no objetivu mak lori ita tama mai FRETILIN tenke hatene loloos sira-ne’e, atu nune’e labele monu ba ema-nia bosok. Tanba ne’e, tuir formasaun labele nonook rona de’it maibé presiza mós tenke halo peskiza ba livru sira atu nune’e bele hatene loloos istória FRETILIN no funu nian,” nia esplika. 

Partisipante sira ne’ebé parstisipa iha formasaun ne’e maihosi kuadru no militante FRETILIN hosi munisípiu 12 no kada munisípiu ida reprezenta ema na’in rua (2) no formasaun ne’e sei hala’o durante loron sanulu nia laran iha Dare.

Jornalista: Osória Marques

Editór: Cancio Ximenes

1 KOMENTÁRIU

  1. Hau hatutan tan deit katak se mak hakarak hatene kona ba Fretilin entaun mai iha Fretilin sei ita koalia kona ba hatene klean abut husi Fretilin nia atu sai Fretilin ida Furo ba Futuro no ba bebeik.

HAKEREK NO HATÁN

Please enter your comment!
Please enter your name here