Governadór BCTL, Abrãao de Vasconselhos. Imajen Tatoli/António Gonçalves

DILI, 19 outubru 2020 (TATOLI)—Governadór Banku Sentrál Timor-Leste, Abrãao de Vasconselhos, relata progresu serbisu ba Primeiru-Ministru (PM), Taur Matan Ruak, hanesan inisiativa bankária ne’ebé Governu bele utiliza iha implementasaun programa.

“Ha’u husu hasoru malu ho Primeiru-Ministru tanba iha asuntu balun mak presiza trata ho Governu, hanesan inisiativa lubuk ida ne’ebé Banku Sentrál lansa liuliu dezenvolvimentu sistema finanseira. Ha’u husu atu investimentu ne’ebé  Banku Sentrál halo iha sistema finanseira, Governu bele aproveita liuhosi programa sira hanesan sistema pagamentu nasionál ne’ebé maka nia dezenvolve di’ak liu oituan kompara ho tinan hira ikus,” Governadór BCTL hateten iha Palásiu Governu, segunda ne’e.

Aleinde ne’e, iha mós diskusaun balun kona-ba programa Governu iha tinan ne’e no tinan oin, ne’ebé envolve Banku Sentrál ajuda implementa programa iha parte ekonomia hanesan  moratóriu kréditu ne’ebé sei termina iha fulan ne’e.

“Ha’u mai esplika oituan ba Primeiru-Ministru kona-ba implementasaun programa ida-ne’e no agora daudaun Banku Sentrál serbisu hamutuk Ministériu Koordenadór Asuntu Ekonómiku atu haree implementa programa kréditu balun no espera iha tempu balun oin mai bele implementa,” nia akresenta.

Biban ne’e, Governadór haktuir, PM ninia resposta ba inisiativa bankária hirak ne’e sira pozitivu tebes, tanba ne’e Xefe Governu fó apoiu no promete ministériu sira sei tenta atu ein kaixa sira-nia programa ba sistema bankáriu.

Nia mós introdús katak agora daudaun iha ona sistema koneksaun entre konta bankária ho karteira eletróniku.

“Ida-ne’e plataforma ne’ebé Governu bele utiliza tanba di’ak tebes ba programa ministériu, ezemplu Ministériu Solidaridade Sosiál no Inkluzaun (MSSI) no Ministériu Edukasaun (ME) bele uza plataforma ne’e hodi ajuda sira halo pagamentu ninian,” Abrãao subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here