Sesaun plenária Parlamentu Nasionál. Imajen/TATOLI

DILI, 19 outubru 2020 (TATOLI)—Vise-Prezidente Parlamentu Nasionál, Deputadu Luis Roberto, hateten tuir ajenda, aban, Parlamentu Nasionál (PN) sei debate ho Governu kona-ba medida rekuperasaun ekonómika.

Notisia Relevante: Rekuperasaun ekonómika: prevee millaun $113,4 ba medida haat kurtu prazu

Deputadu Luis Roberto fó-sai asuntu ne’e liuhosi plenária, ohin, katak dokumentu sira kona-ba medida rekuperasaun ekonómika ne’e iha ona deputadu sira.

“Ha’u husu ba tékniku sira atu fahe ona dokumentu sira-ne’e ba nai deputadu sira atu nune’e aban ita debate ho di’ak,” Deputadu Luis Roberto, informa liuhosi plenária, segunda ne’e.

Nune’e mós Prezidente Komisaun C (Finansa Públika), Deputada Maria Angélica Rangel reforsa, aban diskusaun importante ida ho Governu kona-ba medida rekuperasaun ekonómika ne’e.

“Ha’u husu ba deputadu sira atu foti dokumentu ne’e hodi estuda nune’e aban ita debate ho Governu,” Prezidente Komisaun C ne’e fó hanoin ba deputadu sira.

Ajenda debate medida rekuperasaun ekonómika ne’e, líder bankada sira aprova ona iha  12 outubru, semana kotuk.

Antes ne’e, Ministru Asuntu Parlamentár no Komunikasaun Sosiál, Francisco Jerónimo, hateten VIII Governu Konstitusionál sei aprezenta medida rekuperasaun ekonómika ba Parlamentu Nasionál (PN) iha loron 20 outubru 2020.

Iha proposta-lei Orsamentu Jerál Estadu (OJE) 2020 ne’ebé Parlamentu Nasionál aprova ona ho montante biliaun $1.497,1. Hosi montante orsamentu ne’e prevé millaun $113,4 ba medida rekuperasaun ekonómika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here