Treinador Ponta Leste, Eduardo Pereira. Imajen/Mídia FFTL

ERMERA, 18 outubru 2020 (TATOLI)—Treinadór AS Ponta Leste, Eduardo Pereira, louva defeza Assalam FC ne’ebé konsidera iha esperiénsia maka’as, hafoin sai adversáriu iha jogu oitavu finál kopa Federasaun Futeból Timor-Leste (FFTL).

Assalam FC hetan vitória hasoru AS Ponta Leste ho score ikus 1-0 iha Estádiu Café Ermera, postu administrativu Gleno, munisípiu Ermera, liuhosi auto golu hodi rezulta ekipa Assalam ultrapasa ba semi finál.

“Lakon ida ohin ami hetan ne’e sala hosi ami-nia defeza tanba laiha komunikasaun di’ak ho baliza maka mosu auto golu ne’e. Iha segunda parte ami halo mudansa ba jogu no halo presaun maka’as ba Assalam, maibé sira-nia defeza mak di’ak demais no iha esperiénsia maka’as entaun to’o ikus ami lakon,” Treinadór ne’e hateten liuhosi konferénsia imprensa ne’ebé hala’o iha Estádiu Café Ermera, domingu lorokraik ne’e.

Notísia Relevante: Ponta Leste dada-an hosi oitavu finál liuhosi auto golu

Biban ne’e, nia husu ba árbitru atu dirije jogu ho didi’ak tanba iha fallansu balun iha kampu laran durante jogu.

Iha fatin hanesan, treinadór Assalam, Gaspar Quintão, kontente bele manán hodi ultrapasa ba faze tuir mai.

Nia otimista, ba oin sei hadi’a di’ak liután liña oin no klaran atubele hasoru SLB iha semi finál ho di’ak.

“Jogu ohin kapas tebes no ha’u kompara Ponta Leste di’ak liu ami maibé vitória iha ami-nia liman, entaun ami mak manán. Iha jogu tuir mai ami sei prepara jogadór sira ho di’ak,” dehan Gaspar.

Jornalista: Hortêncio Sanchez

Editora: Julia Chatarina

HAKEREK NO HATÁN

Please enter your comment!
Please enter your name here