Padre Ilídio Correia. Imajen/Facebook

DILI, 18 outubru 2020 (TATOLI)Vigáriu Provinsiál ba Kongregasaun Salesiana Dom Bosco iha Timor-Leste, Padre Manuel Pinto, informa, Padre Ilídio Correia ninia mate isin sei haloot ho matebian salesianu seluk iha Fatumaca, municípiu Baucau.

“Ami Konsellu Pronvinsiál sei ko’alia ho família katak Amu matebian ninia isin sei haloot iha Fatumaca, tamba Fatumaca sai hanesan jardín ou simentériu ida ba salesianu hirak ne’ebé mak fila hikas ona ba Aman Maromak,” Padre ne’e dehan ba Agência Tatoli, iha Kapela São João Bosco, Comoro, domingu ne’e.

Nia hatutan, aban sei iha misa jerál ida no sei lori mate isin Amu ba ninia moris fatin iha postu administrativu Vemasse, munisípiu Baucau.

“Kuandu termina misa mak lori fali ba komunidade Fatumaca atu haloot mate isin hamutuk ho salesianu sira seluk. Ami sei hela Padre Provinsiál, Apolinário Neto ne’ebé sei halo vizita Kanónika iha komunidade salesiana Fuiloro, munisípiu Lautém, no bainhira nia mai sei iha enkontru atu ko’alia buat hirak ne’e,” nia akresenta.

Notísia Relevante: Padre Ilídio Correia fila hikas ba Aman Maromak

Amu ho naran kompletu Ilídio Eduardo do Rosário Correia, moris iha Vemasse iha loron 13 outubru 1970, nu’udar oan daneen hosi maun alin bin na’in-neen.

Padre ne’e hala’o ninia profisaun perpétua dahuluk iha loron 24 maiu 2000 no simu ordenasaun nu’udar Amu lulik iha loron 01 maiu 2002.

Nu’udar salesianu ida, Padre Ilídio hala’o niniaa knaar iha uma salesiana, tuir mai mak iha komunidade Venilale, munisípiu Baucau.

Aleinde serbisu iha uma salesiana, Padre mós hala’o knaar balun iha Dioseze Baucau no Dili to’o ohin loron.

Komunidade ikus ne’ebé mak Amu ne’e hala’o ninia knaar to’o hakotu iis maka komunidade Comoro, Dili.

Iha komunidade ne’e, Padre hala’o nia knaar nu’udar Vise-Diretór hahú tinan 2019 no iha tinan 2020 nu’udar tinan dahuluk nia hala’o knaar nu’udar Diretór iha Casa Pós-noviciado, Comoro.

Iha domingu dadeer ne’e, maizumentu tuku 10:45, Padre Ilídio hakotu nia iis iha Hospitál Nacional Guido Valadares (HNGV) tanba sofre moras korasaun.

Tuir ajenda, iha segunda (19/10) tuku 06:00 sei realiza misa iha Kapela Centro de Treinamento Dom Bosco  (CENTEC), tuku 09:00 sei iha misa iha Igreja Vemasse, hafoin iha tuku 15:00 realiza misa funebre iha Santuáriu Fatumaca.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here