Arsebispu ba Arkedioseze Metropolitana Dili, Don Virgílio do Carmo da Silva, ho komitiva vizita mate isin Padre Ilídio Correia iha Kapela São Jõao Bosco, Comoro, domingu (18/10). Imajen Tatoli/Domingos Piedade Freitas

DILI, 18 outubru 2020 (TATOLI)Arsebispu ba Arkedioseze Metropolitana Dili, Don Virgílio do Carmo da Silva, konsidera falesimentu Diretór Comunidade do Pós-noviciado (CPN), Padre Ilídio Correia, Salesiano de Dom Bosco (SDB), halo Kongregasaun Salesiana no Igreja Katólika Timor-Leste lakon figura di’ak.

Amu Ilídio hakotu iis iha sala emerjénsia Hospital Nacional Guido Valadares (HNGV) maizumenus tuku 10:45 dadeer ne’e tanba sofre moras korasaun, hafoin dirije misa tuku 09:00 iha Igreja Parokia Maria Auxiliadora Comoro, maibé la konsege to’o ramata.

Tuir Don Virgílio, Salesiana investe ona ba Padre Ilídio, hanesan haruka ba hasai doutoramentu iha Direitu Kanóniku iha Filipina.

“Bainhira ko’alia kona-ba Amu nia mate, ha’u hanoin Kongregasaun no Igreja lakon ema di’ak ida tamba durante ne’e fó ninia kontribuisaun tomak iha área Direitu Kanóniku no mós hanesan formadór di’ak iha Kongregasaun Salesiana nia laran. Ita agradese ba Maromak tamba fó nia mai ba Uma-kreda no Kongregasaun, ita hotu reza atu nia bele deskansa ho hakmatek,” Arsebispu Dili dehan ba Agência Tatoli, hafoin halo bensaun Padre Ilídio ninia mate isin iha Kapela São João Bosco, Comoro, domingu ne’e.

Notísia Relevante: Padre Ilídio Correia fila hikas ba Aman Maromak

Don Virgílio rekoñese Padre ne’e ninia kontribuisaun ba Uma-Kreda no parte seluk tan.

“Ita hotu la nega tamba fó ona ninia kontribuisaun ba Uma-kreda hodi fó apoiu Arkedioseze Dili no hanesan ekipa juríku dioseze, inklui iha Kongregasaun Salesiana nu’udar Diretór Comunidade do Pós-noviciado,” nia akresenta.

Bispu haktuir, iha tinan 2010 to’o 2020 Igreja husu Kongregasaun Salesiana, iha tempu Padre Andreas Caleja, hodi autoriza Amu Ilídio Correia nu’udar representa Kongregasaun no Igreja hodi hala’o serbisu nu’udar Sekretáriu Jerál hamutuk ho Núnsiu Apostóliku Roma ba Indonézia no Timor-Leste, Leopoldo Girelli.

“Kuandu iha família ida maka ema ida mate, sertamente triste satan Amu lulik ida mak mate, hanesan todan ida ba Kongregasaun Salesiana, nune’e mós ba Igreja Katólika Timór lakon figura di’ak ida,” nia subliña.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here