Prezidente Autoridade munisípiu Ermera, José Martinho dos Santos Soares. Imajen Tatoli/Egas Cristovão

DILI, 18 outubru 2020 (TATOLI)–Prezidente Autoridade munisípiu Ermera, José Martinho dos Santos Soares, husu Parlamentu Nasionál (PN) tau importánsia halo diskusaun ba Lei Podér Lokál tanba konsidera lei ne’e importante atu fó podér ba autoridade lokál sira hala’o knaar hodi hatan preokupasaun komunidade.

Lei podér lokál pertinente tebes. Ita hein aprovasaun hosi Parlamentu Nasionál no ita espera sira tau importánsia. Sé podér ne kontinua iha sentrál maka sei implika dezenvolvimentu iha munisípiu no dezekuilíbriu iha programa dezenvolvimentu ne’e rasik tanba munisípiu sira sai dependente ba nasionál,” Prezidente Autoridade ne’e informa ba Agência Tatoli, via email, domingu ne’e.

Nia haktuir, durante ne’e munisípiu hala’o knaar bazeia de’it ba dekretu-lei númeru 3/2016 ne’ebé hanesan amendadu hosi dekretu-lei númeru 9/2018 no diploma ministeriál numeru 48/2016.

Prezidente Autoridade konsidera, diploma ministeriál nu’udar matadalan atu implementa objetivu loloos hosi dekretu-lei númeru 3/2016, maski seidauk kompletu.

Durante ne’e, ami ezekuta programa ne’ebé transfere ona mai ami, maibé barak maka seidauk entrega nu’udar kompeténsia munisípiu tanba rekursu seidauk sufisiente no iha hela faze tranzisaun ba desentralizasaun kompletu inklui limitasaun ba aktu sira ne’ebé seidauk deskreve iha lei,” nia konta tuir.

Notísia Relevante: Komisaun A sei diskute lei podér lokál iha 2021

MAE sei halo revizaun ba planu estratejia desentralizasaun administrativa

José Martinho fó hanoin, bainhira hakarak implementa polítika desentralizasaun presiza harii podér lokál tuir padraun ne’ebé iha nu’udar país demokrátiku.

“Razaun fundamentál atu lori servisu públiku besik liu ba povu no bele kumpre artigu 5 Konstituisaun kona-ba desentralizasaun no artigu 72 kona-ba podér lokál,” nia akresenta.

Prezidente Autoridade dehan, durante ne’e kompeténsia sira laiha implikasaun maibé prosesu atu desentraliza podér mak sei paradu tanba durante ne’e ezekuta lei Projetu Dezenvolvimentu Integradu Munisipál (PDIM) ho montante másimu $500.000.

Nia subliña, maski munisípiu Ermera prontu tanba ein termu kuantidade rekursu umanu laiha sufisiente, maibé Governu sentrál presiza kria kondisaun ho baze infraestrutura no rekursu umanu.

“Importante liu maka tenke hahú atu nune’e bele estuda vantajen no desvantajen ne’ebé iha, inklui buka atu hadi’a ba beibeik,” Autoridade munisipál ne’e otimista.

Nia konsidera, polítika desentralizasaun hanesan mandatu Konstitusionál, ne’ebé sé de’it mak kaer ukun  presiza alkansa mandatu ne’e.

Autoridade ne’e dehan, presiza duni iha lejizlasaun hodi suporta tanba munisípiu Ermera hanesan baze ba agrikultura liuliu kafé, ortikultura, turizmu no rekursu minerál iha parte balun.

Prezidente Autoridade ne’e fó sai katak Ermera hetan apoia hosi sidade amiga iha Austrália no Portugál atu implementa desentralizasaun no lei podér lokál ne’e.

Antes ne’e, Prezidente Komisaun A ne’ebé trata asuntu Justisa no Konstituisaun, Deputadu Joaquim dos Santos, informa Lei Podér Lokál ne’e sei deskute iha tinan 2021.

Iha loron 17 fevereiru, Ministériu Administrasaun Estatál (MAE), aprezenta Projetu Dekretu Governu ba Konsellu Ministru, kona-ba alterasaun daruak dekretu-lei númeru 03/2006 16 marsu, ne’ebé mak aprova Estatutu Administrasaun Munisipál no Grupu Tékniku Interministériál ba Dezentralizasaun Administrativa.

Nune’e, alterasaun ne’e fó biban ba Governu hodi estabelese estrutura naton iha munisípiu sira hodi bele fó atendimentu ba komunidade bele hakbesik Governu sentrál ba povu.

Preparasaun ba polítika desentralizasaun 

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu Sentrál ba povu, tanba ne’e presiza hakbiit liután rekursu umanu sira iha área administrasaun no jestaun.

Dezde tinan 2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun artigu 72 no Planu Estratéjiku Dezenvolvimentu Nasionál (PEDN).

Artigu 72 konstituisaun RDTL hakerek kona-ba podér lokál iha alínea 1 haktuir, sei harii kbiit lokál hoema koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian, kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Nune’e mós, iha alínea 2 husi artigu hanesan hateten, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Antes ne’e, Governu anteriór fó ona delegasaun kompeténsia ba munisípiu haat hanesan Baucau, Bobonaro, Dili no Ermera.

Iha PEDN Kapítulu IV haktuir, desentralizasaun nia prinsípiu maka oinsá atu dezenvolve setór privadu, promove instituisaun sira ne’ebé forte no lejítimu iha nasaun tomak ho estável no mós iha oportunidade partisipasaun demokrátika.

Iha tinan-2016, Governu kontinua polítika desentralizasaun maibé la liuhosi eleisaun munisipál tanba lei laiha, ne’e duni Governu halo esforsu hodi kontinua preparasaun mak iha Dekretu Lei númeru: 3/2016 ne’ebé alteradu ho Dekretu Lei Nú. 9/2018, ne’ebé mensiona katak preparasaun sei liuhosi Deskonsentrasaun Administrativa, katak tau munisípiu hanesan administrasaun direta hosi Estadu.

Desentralizasaun Institusionál, hatúr munisípiu nu’udár administrasaun indireta hosi Estadu, no, Desentralizasaun Territoriál hatúr munisípiu sira nu’udár Governu lokál ida ho ninia Asembleia Munisipál.

Rezolusaun apoiu polítika desentralizasaun

Iha loron 5 marsu 2019, VIII Governu Konstitusionál liuhosi enkontru Konsellu Ministru, aprova rezolusaun ida hodi apoiu polítika ba implementasaun desentralizasaun administrativa ba munisípiu sira seluk.

Ministériu Administrasaun Estatál submete rezolusaun ne’e hodi kesi ministériu ne’e ho ministériu relevante, hodi fó apoiu ba prosesu desentralizasaun hodi bele la’o ho efetivu, nune’e tinan haat to’o lima mai bele atinje objetivu podér lokál iha munisípiu sira tuir artigu 72 Konstituisaun.

Nune’e mós, iha aprezentasaun orsamentu 2020, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé destina atu prenxe vaga  sira ne’ebé ezistente iha mapa pesoál  husi Autoridade Munisipál  no administrasaun munisipál sira.

Aleinde ne’e, prevee mós millaun $9,4, ne’ebé destina  atu fó apoiu ba projetu oin-oin  ne’ebé Autoridade Munisipál  no Administrasaun Munisipál sira promove iha ámbitu Planu Dezenvolvimentu Integradu Munisipál (PDIM).

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here