Sekretáriu Estadu Juventude no Desportu, Abrão Saldanha. Imajen/SEJD

DILI, 17 outubru 2020 (TATOLI) – Sekretáriu Estadu Juventude no Desportu (SEJD), Abrão Saldanha, louva ho juventude sira hosi Knua Fila Liman ne’ebé iha inisiativa kria programa ne’ebé di’ak hanesan lansa Youth Co.

Atividade ne’ebé juventude Knua Fila Liman lansa programa ida mós hosi ajénsia internasionál iha Timor -Leste UNDP.

“Iha fatin ida ne’e, Knua Juventude Fila Liman, ha’u mai ko’alia dala rua ka dala tolu ona, ho ema balu hanesan, maibé kada vez ha’u mai sempre iha ema foun mós. Ohin, haksolok dala ida tan mak ha’u simu konvite hosi Knua Juventude Fila Liman atu mai ko’alia iha ne’e iha lansamentu Youth Co, Lab Challenge ba tinan-2020 nian,” Sekretáriu Estadu Abrão Saldanha hateten  liuhosi komunikadu Agência Tatoli asesu, ohin.

Abrão Saldanha agradese ba organizadór sira, Timor-Leste Accelerator Lab, Knua Juventude Fila-Liman no Recycling Promotion Pilot Project ba inisiativa importante ida ne’e, bele dehan joven sira parte ida hosi solusaun ba problema, la’ós solusaun ba kria problema.

“Ha’u ko’alia ona iha ne’e no iha fatin barabarak kona-ba vizaun polítika ne’ebé ha’u lori mai asume kna’ar nu’udar Sekretáriu Estadu ba Juventude no Desportu. Liuliu vizaun ba juventude ne’ebé mosu hosi fiar katak joven sira parte hosi solusaun ba problema, la’ós parte hosi problema,” nia hateten.

Nia sente haksolok bele hetan oportunidade dala ida tan ba asiste rezultadu hosi joven sira nia serbisu ne’ebé fó prova duni katak foin-sa’e sira forsa kriativa ida.

“Youth Business Expo ne’ebé ha’u haree ohin, ita hotu haree iha ne’e, hatudu evidénsia forte katak joven sira forsa ne’ebé iha poténsia no kapasidade ba kria solusaun ba problema sosiál no ekonomia ne’ebé ita nia rain no mundu enfrenta,” nia tenik.

Inisiativa ida ne’e, hanesan ho hamutuk no inisiativa barabarak hosi entidade no indivíduu oioin hatudu katak vizaun polítika “FOIN-SA’E MILLENNIAL FORSA KRIATIVA” ne’e la’ós retórika de’it ka slogan mamuk laiha signifikadu.

“Pesoalmente, ha’u hakarak hato’o obrigadu ba Sra. Munkhtuya, reprezentante rezidente UNDP nian no UNDP tomak ba ajuda fó espasu no promove joven Timor oan sira nia talentu,” nia afirma tan.

 Nia argumenta, joven sira forsa kriativa ne’ebé iha kapasidade atu kria solusaun ba sira nia problema rasik no problema nasaun nian.

“Fiar ida ne’e ha’u iha ho baze ba reflesaun kle’an ne’ebé ha’u halo iha tinan barak nia laran ba realidade loroloron ita joven sira nian, iha Timor-Leste no iha rai barabarak iha mundu tomak. Vizaun ida ne’e, vizaun ita joven sira nian, realidade ita joven sira nian,” Abrão Saldanha hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here