Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 17 outubru 2020 (TATOLI)–Prezidente Administrasaun Institutu Nasionál Seguransa Sosiál (INSS), Longuinhos Armando Leite, hateten kartaun Númeru Identidade Seguransa Sosiál (NISS) labele prodús iha tinan ida rua nia-laran maibé presiza tempu naruk.

Notísia Relevante: Ho NISS Funsionáriu Bele Identifika Valór SS

“Ita labele prodús kartaun NISS iha tinan ida-rua nia-laran maibé presiza tempu naruk,” dehan Prezidente INSS, Longuinhos Armando Leite, ba Agência TATOLI iha nia knaar fatin MSSI Caicoli, Dili, foin lalais ne’e.

Longuinhos hatutan, Timor Leste foin ukun tinan 18 nia laran no lei harii iha 2017 maibé Institutu Nasionál Seguransa Sosiál (INSS) eziste iha 2019, entaun foin mak la’o ba tinan rua.

Tuir informasaun, nia dehan, Governu hakarak estabelese ID úniku katak ema ida tenke ID ida loos de’it ona, labele iha kartaun barak.

“ID úniku ne’e vale ba buat hotu-hotu inklui kartaun eleitorál, pasaporte, BI, karta kondusaun, ATM no seluk tan, tenke uza ida de’it labele halo keta-ketak nune’e fasil ba ema hodi utiliza bainhira presiza saida de’it,” nia esklarese.

Ho estabelesementu ID úniku iha nasaun avansadu, prezidente INSS hateten, Governu Timor-Leste mós hanoin atu estabelese hanesan ne’e iha  rai doben ida-ne’e tanba planu ne’e halo parte iha programa Governu nian ba 2021.

Nia dehan, importante mak Institutu Nasionál Seguransa Sosiál (INSS) estabelese ona kartaun NISS ne’e no kada ema nia NISS úniku ona no sei la troka NISS.

Notísia Relevante: Sistema kontribuisaun fakultativa asegura traballadór ne’ebé para servisu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here