Matebian José Afonso das Neves hanesan tékniku EDTL. Imajen/MOP

DILI, 17 outubru 2020 (TATOLI)–Ministru Obra Públika, Salvador Eugênio Soares dos Reis Pires, hato’o sentidu kondolénsia profunda ba família, faluk, oan-ki’ak hosi matebian José Afonso das Neves, ne’ebé hakotu iis bainhira hala’o serbisu atendimentu ba liña media tensaun, kotu iha área Alawa-Afaguia, postu administrativu Baguia, munisípiu Baucau iha sesta (15/10).

Ho laran triste, governante ne’e konsidera tékniku Eletricidade de Timor-Leste (EDTL) hanesan eroi ne’ebé sempre garante naroman enerjia eletrisidade ba ema hotu, maski durante hala’o sira nia knaar sempre hasoru dezafíu.

“Ha’u-nia funsionáriu EDTL, liuliu iha liña distribuisaun, fó sira-nia dedikasaun tomak atu asegura liña eletrisidade hodi fó asesu ba ema hotu. Normalmente sira husik sira-nia família, feen no oan-ki’ik ne’ebé presiza sira-nia domin atu sira bele presta serbisu ba ema hotu. Ba ha’u tékniku EDTL hanesan eroi umanu ba ita-nia nesesidade, ne’ebé ita hotu presiza loron-loron tanba sira husik sira-nia família ho dedikasaun tomak ne’ebé presta durante ne’e,” Ministru Salavaldor dehan liuhosi nota imprensa ne’ebé Agência Tatoli asesu, sábadu ne’e.

Notísia Relevante: Tékniku EDTL Baucau mate tanba ahi soke

Nune’e,  Governante ne’e husu ba públiku atu respeita serbisu tékniku EDTL tanba bele fó risku ba vida rasik.

“Tékniku EDTL merese hetan respeitu no harohan Aman Maromak, haraik fatin di’ak ba matebian horik rohan laek no husu fó perdaun ba sala ne’ebé halo durante moris,” nia dehan.

Tanba ne’e, Ministru lori entidade tomak iha Ministériu Obra Públika (MOP) hato’o agradesimentu ba dedikasaun serbisu matebian ne’ebé serví ona nasaun liuhosi EDTL.

Matebian hanesan funsionáriu EDTL destakadu iha postu administrativu Baguia, munisípiu Baucau, ne’ebé durante ne’e halo atendimentu ba liña enerjia eletrisidade iha área Baguia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here