DILI, 17 outubru 2020 (TATOLI)—Ajénsia Internasionál KOICA-KIDC iha Timor-Leste, ohin, fó apoiu treinamentu futebol báziku ba estudante Ensinu Báziku Sentrál 30 Agostu (EBS 30 Agostu) no Ensinu Báziku Sentrál Farol (EBC Farol).

Diretór KOICA, Kim Sik Hyeon, hateten KOICA-KIDC hakarak suporta alunus sira liuhosi desportu tanba sente desportu mak bele desenvolve alunus sira iha moris loro-loron maske agora pendemia COVID-19 la’o nafatin.

“Maske agora COVID-19 la’o nafatin maibé voluntáriu hosi Koica sira-nian koko halo esforsu nafatin atu halo projetu ne`e la`o nafatin. KOICA-KIDC mós ajuda ona iha distritu seluk, koko atu fó nafatin suporta iha parte desportu nian. Haree katak desportu halo labarik sira haksolok tebes. Maske COVID-19 labele hasoru malu maibé hosi parte Koica nian koko nafatin atu halo online Class ba alunus sira, atu nafatin hetan koñesimentu kona-ba desportu,” dehan Diretór KOICA, Kim Sik Hyeon, ba Agência TATOLI iha Kampu FFTL, sábdu ne`e.

Nia hateten, hosi desportu mak estudante sira bele hatene di’ak liután oinsá atu moris ho integridade no ambiente ne’ebé mak di’ak.

Iha fatin hanesan, Diretór Ensinu Báziku Sentrál terseiru siclo 30 Agostu, Filomeno Salsinha, informa durante profesór voluntáriu hosi KOICA iha tinan ne’e mai fó treinamentu futeboll báziku ba estudante sira tanba COVID-19 sira fila ba sira nia-rain maibé atividade treinamentu la’o nafatin liuhosi Online ba estudante sira.

“Ohin, mai hamutuk iha FFTL atu koko estudante sira-nia koñesimentu báziku kona-ba futebol. Estudante sira ne’ebé partisipa iha treinamentu kada eskola hamutuk na’in-15,” nia dehan.  

Aleinde ne’e, Diretór Ensinu Báziku Sentrál Farol (EBC Farol), Nicolao Ximenes, hatete treinamentu ne`e hetan apoiu hosi KOICA ne`ebé durante ne`e fó treinamentu futebol báziku ba estudante sira durante fulan ida-nia laran.

“Ho apoia hosi KOICA ni’an, atu estudante sira bele komprende saida mak iha futebol báziku ni’an. Ha’u sente kontente no agradese tanba hosi parte KOICA nian bele ajuda dedika-aan fó treinamentu ba estudante sira atu bele sai hanesan futebolista ba aban-bainrua ba Timor nian,” nia hateten.

Pandemia COVID-19 ne’ebé afeta ba mundu tomak, afeta mós ba servisu voluntáriu KOICA-KIDC nian iha Timor-Leste, hanesan medida prevensaun ida hosi COVID-19 ne’ebé tenke mantein distánsia sosiál. Tanba ne’e, KOICA-KIDC deside implementa aula online ba eskola rua, hanesan EBC 30 Agostu no EBC Farol, mak sai hanesan trrajetu ba KOICA-KIDC atu esperimenta halo aula online no treinamentu futebol nian ba estudante sira.

Aula ne’e hahu iha 21 setembru no ofisialmente ramata iha loron 23 outubru. Aula ne’e la uza internet maibé voluntáriu KOICA-KIDC ne’ebé antes servisu iha FFTL mak fó treinamentu liuhosi video ne’ebé antes sira prepara ona hosi Korea.

Video ne`e sai hanesan manuál ida atu hanorin estudante sira kona-ba tékniku futebol báziku nian, hanesan pasu, finta, pasa no xuta. Aula ne`e halo durante semana haat nia laran no taka ho mini kompetisaun entre eskola rua ne`e.

Entretantu, objetivu ba jogu ohin nian atu halo estudante sira tau iha prátika skill ne`ebé sira aprende ona durante semana haat nia laran.

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here