Klube futeból estimadu kapitál Dili nian, Karketu Dili FC, simu derrota no tenke “eliminado” hafoin lakon ho Boavista FC Timor, 0-1. Imajen/FFTL

GLENO, 17 outubru 2020 (TATOLI) – Klube futeból estimadu kapitál Dili nian, Karketu Dili FC, simu derrota no tenke “eliminado” hafoin lakon ho Boavista FC Timor,  0-1 iha jogu oitavu finál kopa  Federasaun Futeból Timor-Leste  (FFTL) ne’ebé hala’o iha Estádiu Café, Gleno.

Notísia Relevante : Kopa FFTL iha oitavu final, Karketu “prontu” enfrenta Boavista

Diretór tékniku Karketu Dili FC, Elizeu Isaac, rekoñese, derrota ne’ebé sira simu tanba jogadór lakon konsentrasaun.

“Téknikamente ami lakon konsentrasaun uitoan iha primeira parte mak ami simu golu tanba defeza menus komunikasaun ba malu. Maibé, tama ba jogu nia klaran, ami sente jogu ida kompetitivu tebes, maibé oportunidade mak ladún iha hodi ami atu halo golu. Parabéns ba Boavista FC Timor,” deklara Elizeu Isaac, liuhosi konferénsia imprensa hafoin remata jogu entre parte rua iha Estádiu Café Gleno.

Karketu joga la efetivu hanesan istória ne’ebé jogadór Karketu sira presta tiha ona ba klube favoritu sidade oan Dili nian ne’e.

Bele dehan, iha  esperiénsia Liga Futeból Amadora (LFA)  époka primeiru to’ o ohin loron, Boavista FC Timor difisil atu manán Karketu Dili FC. Maibé, realidade loraik ne’e iha adeptu lubun ua’in Karketu nian iha Estádiu Café, Gleno, Boavista hatudu nia prestasaun “superiór” duni ba Karketu, maske mana de’it ho golu úniku 0-1.

Notísia Relevante : Empata,trainadór Boavista FC rekoñese fallansu tékniku

Jogu ohin loraik, adeptu parte rua nian hakonu tebes tribune Estádiu Café hodi fó suporta no haklalak viva Karketu no viva Boavista. Jogador sira orgullu ho suporta adeptu sira nian, maibé Dewi Fortuna pertense liu ba Boavista hodi “tebe sai” duni Karketu hosi Karketu nia mehi atu ba kompete iha semi finál ka kuatru finál.

Minutu primeiru  hahú jogu, Boavista halo persegisaun maka’as liuhosi nia médiu no defeza sira hodi tuda bola as ba Avansadu Edit Savio (9) no Fransyatma Kefi (21). Maibé avansadu rua ne’e iha minute primeiru atrapalla tanba defeza Karketu halo defensive ida solidu tebes. Maibé, hakat ba minutu tolu bola komesa barullu iha liña oin Karketu nian halo guarda rede Frenky Cardoso (20) atrapalla.

Aproveita frakeza ida-ne’e, Orcelio da Silva (3) hosi Boavista pasa kedan bola ho lalais ba Fransyatma Kefi hodi “les’ baliza Karketu ne’ebé  rezulta score 1-0 ba Karketu.

Esperansa boot ba Karketu iha minutu sira antes to’o minutu 90 bele hatama golu. Maibé esforsu hotu jogadór Karketu nian hela ho esforsu de’it to’o árbitru huu apitu naruk termina jogu entre parte rua mantein ho score 1-0 hosi Boavista ba Karketu.

Rezultadu ne’e lori Boavista hetan direitu absoluta hakat ba semi finál hodi kontra klube jigante Lalenok United FC.

Elizeu Isaac argumenta, bainhira partisipa iha kopa FFTL, Karketu laiha alvu atu sai kampiaun, maibé objetivu atu rekoopera hikas jogadór sira-nia stamina durante surtu Covid-19.

Iha fatin hanesan treinadór Boavista, Miro Baldo Bento hateten, istória entre klube rua-ne’e nakfera ona. Tanba dezde uluk kedas Karketu “tebe-rai” dehan, jogu saida de’it Boavista sei la manan no nunka manan Karketu.

“Uluk kedan dehan jogu saida de’it Boavista sei la manan Karketu. Maibé, ohin ami manan, entaun istória sobu ona, sira moe ona mak ko’alia taka moe. Ne’e, ha’u mak dehan,” afirma Miro Baldo Bento.

Relasiona ho jogu ne’ebé nia ekipa ultrapasa ba semi finál ne’ebé sei kontra Lalenok, Miro Baldo Bento, afirma, nia-parte  sei prepara nia jogadór sira ho di’ak atu bele enfrenta klube Lalenok FC ne’ebé na’in mak Superintendente Xefe Pedro Belo, atuál Komandante Operasionál Nasionál Polísia  Nasionál Timor-Leste (PNTL).

“Jogu semi finál ha’u sei prepara jogadór sira ho di’ak, ami respeita ekipa Lalenok, mas  ami sei hatudu jogu ne’ebé bele dehan, Lalenok atu manan mós ita hasai kosar lai iha minutu 90 nia laran,”  Miro Baldo Bento subliña tan.

Jornalista : Hortencio Sanchez

Editór       : Francisco Simões

HAKEREK NO HATÁN

Please enter your comment!
Please enter your name here