Prezidente Repúblika, Francisco Guterres Lú Olo. Imajen TATOLI/António Gonçalves

DILI, 16 outobru 2020 (TATOLI)–Prezidente Repúblika (PR), Francisco Guterres ‘Lú Olo’, kongratula Ajénsia Internasionál ba ai-han nian (Food and Agriculture Organization-FAO) ne’ebé ohin selebra ninia loron ezisténsia ba dala 75.

“Ha’u hato’o parabéns ba FAO tanba ohin selebra ninia aniversáriu ba dala 75. Ajénsia internasionál ida ne’e harii iha 16 outubru 1945 hodi tau matan ba ai-han no agrikultura. Tinan haat nulu liubá, iha loron aniversáriu FAO nian, ONU deside hatuur 16 outubru, nu’udár Loron Mundial Ai-Han nian,” dehan Prezidente Repúblika, Francisco Guterres ‘Lú Olo’, liuhosi komunikadu ne’ebé Agência TATOLI asesu, sesta ne’e.

Xefe estadu ne’e hateten, inisiativa selebra mós Loron Mundial Ai-Han iha Timor-Leste hahú hosi Diretór-Jerál FAO nian iha Dili ho tema ba tinan ida ne’e mak “Kuda, Haburas, Sustenta, Hamutuk, Ita-nia lala’ok ohin loron mak ita-nia futuru”.

Aman nasaun ne’e hateten, Timor-Leste simu eventu ida ne’e nu’udár Estadu-Membru ONU nian no partisipa ho lala’ok oin-oin ne’ebé permite fahe liután informasaun ba ita-nia ema kona-ba nesesidade atu hasa’e produsaun, prodús ai-han oin-oin liután no ho kualidade, oinsá han di’akliu, atu ita-nia ema bele moris saudável ohin loron no aban bainrua.

“Tanba eventu ohin nian ko’alia kona-ba ai-han, ha’u-nia neon halai kedas ba maluk agrikultór sira, ita-nia produtór primáriu, liu-liu ba sira ne’ebé moris ho susar oin-oin iha área remota no seidauk simu ka simu apoiu oituan de’it husi Governu. Tuir Relatóriu kona-ba IGF, Índise Globál ba Hamalaha 2020, Timor-Leste tama iha lista rai sira ne’ebé hamalaha no ho má-nutrisaun aas tebe-tebes. Ida-ne’e problema boot ne’ebé ita hotu tenke rezolve. Entre kauza oin-oin, fatór boot liu mak agrikultór barak laiha asesu bei-beik ba irrigasaun no ema uitoan de’it  mak prodús. Governu sira uluk ladún fó atensaun ba produsaun. Governu ida-ne’e iha kompromisu atu apoia agrikultór sira hodi hasa’e produsaun no produtividade,” Prezidente Repúblika hateten.  

Hosi tetu no tais hamutuk hanoin-matenek oin-oin, mak timoroan sira hamosu Planu Rekoperasaun ekonómika ne’ebé Governu sei implementa ho medidas ba prazu badak, médiu no naruk.

Planu Rekuperasaun Ekonómika ne’ebé VIII Governu hato’o dadaun ne’e, sei hatán ba problema sira ne’ebé Timor-Leste hasoru tiha ona hori uluk kedas, ikus mai agrava liután ho pandemia COVID-19.

Ho Planu Rekuperasaun Ekonómika, Governu Timor-Leste hatudu daudaun katak ninia polítika públika haree liuliu ba ema.

“Nune’e, ha’u fiar katak Planu Rekuperasaun Ekonómika ida ne’e sei permite hasa’e produsaun no produtividade ai-han, no sei kontribui ba  hamenus hamlaha ba beibeik. Katak, bainhira ita hasa’e produsaun ho di’ak, ita ida-idak sei han loron-loron ho kualidade di’ak,” Xefe Estadu ne’e fiar.

Atu planu ne’e iha susesu, Xefe estadu sujere katak entidade hotu tenke fó liman ba malu, la haree ba rasa, feto ka mane, otas, relijiaun ka kór polítika.

“Timor-Leste konta nafatin ho Nasaun Unida nia kontribuisaun no ho mós parseiru dezenvolvimentu ida-idak, atu dezenvolvimentu la’o ba oin ho populasaun saudável no matenek, iha aspetu hotu-hotu,” PR Lú Olo hateten.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here