Imajen/WFT Timor-Leste.

DILI, 16 outubru 2020 (TATOLI)--Reprezentante World Food Programme (WFP) iha Timor-Leste, Dageng Liu, hateten EFP kongratula Governu Timor-Leste nia esforsu ne’ebé mak bele foti medida resposta tempu badak nian durante pademia COVID-19.

“Ha’u kongratula Governu Timor-Leste ba nia esforsu hotu tanba bele foti medida resposta kurtu prazu durante pandemia COVID-19 hodi prioritiza nesesidade ema ki’ak sira no uma-kain ne’ebé vulnerável tebes liuhosi investimentu iha programa protesaun sosiál. Hanesan, programa transferénsia osan ne’ebé alvu mak uma-kain ho rendimentu kiik no Programa ‘Cesta Basica” planeadu ona iha fulan hirak tuir mai,” Dageng Liu hateten iha ninia intervensaun iha ámbitu selebrasaun Loron Ai-han Mundiál iha Centro Convenção Dili (CCD), Dili, sesta ne’e. 

Tanba ne’e, ONU iha Timor-Leste preparadu hodi apoia Governu Timor-Leste mak primeiru atu estabelese medida polítika no lei hodi bele hadi’ak sistema ai-han sustentável iha nutrisaun, empregu no protesaun rai.

Segundu, prioritiza inovasaun no dijitalizasaun hodi hadi’ak sistema ai-han no vida agrikultór no traballadór sira.

Terseiru, promove prátika agríkola intelijente hasoru mudansa klimátika. Kintu, apoia produtór agrikola ki’ik sira no erói ai-han sira hodi ajuda sira atu bele respeitu padraun seguransa ai-han no mós promove alternativa merkadu hanesan komérsiu eletróniku.

“Ita haksolok tebes bele testamuña adezaun Timor-Leste nu’udar membru movimentu hadi’ak nutrisaun. Movimentu refere mak esforsu globál hodi elimina má-nutrisaun oin-oin ho prinsípiu katak ema ida-idak iha diretu ba ai-han no nutrisaun di’ak,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here