Debate públiku iha ámbitu komemorasaun tinan 45 trajédia Balibo Five komemora iha Balibo, sesta (16/10). Imajen Tatoli/Antónia Gusmão

BOBONARO, 16 outubru 2020 (TATOLI)–Loron 16 outubru 1975 nu’udar loron trajédia koñesidu Balibo Five, ne’ebé militár indonéziu sira oho jornalista estranjeiru na’in-lima iha Balibo, munisípiu Bobonaro, tanba ne’e sai ona loron importante ba Timor-Leste.

Iha komemorasaun trájedia ne’e ba dala-45, eis Prezidente Repúblika, José Ramos Horta, konsidera ho sakrifísiu jornalista estranjeiru maka fó biban ba jornalista sira hodi bele hato’o lia-loos.

“Jornalista estranjeiru na’in-lima ne’ebé mate iha Balibo ho sira-nia sakrifísiu bele garante liután liberdade imprensa iha Timór no kontribui liberdade imprensa iha mundu. Ita bele lakon buat barak maibé labele lakon liberdade pensamentu no liberdade espresaun,” Horta hateten iha seremónia komemorasaun iha Balibo, sesta ne’e.

Centro Nacional Chega (CNC) hamutuk ho Conselho de Imprensa (CI) komemora tinan 45 Balibo Five, hahú loron 15 to’o 16 outubru ho atividade oinoin, ho objetivu hanoin hikas jornalista ninia kontribuisaun durante ne’e.

Biban ne’e, Premiadu Nobel da Paz ne’e felisita no agradese ba entidade ne’ebé realiza seremónia ne’e tanba bele iha inisiativa komemora loron importante hodi fó ondra no memória ba jornalista ne’ebé mate bainhira hala’o knaar jornalizmu.

Notísia Relevante: CNC-CI komemora tinan 45 Balibo Five ho ezibisaun fotografia

“Ha’u hatene tanba iha esperiénsia pesoál direta ba buat ne’ebé akontese iha ne’e (Balibo) no dalaruma ha’u sente Timor-Leste nu’udár Estadu seidauk halo rekoñesementu loloos, sorte Sentru Nasionál Chega no konsellu imprensa halo atividade ho kreatividade,” nia akresenta.

Horta konsidera atividade ne’e hanesan arte ne’ebé sai hanesan pedagojia di’ak ba povu atu haree parte istória hodi reforsa papél liberdade imprensa.

Eis Xefe Estadu ne’e nota katak fatin hotu iha territóriu nasionál kuaze akontese trajédia ne’ebé kada tinan selebra, tanba ne’e importante atu inklui istória sira iha kurríkulu ne’ebé la’ós kona-baBalibo Five de’it maibé iha fatin seluk ne’ebé envolve jornalista sira.

Nia konsidera buat ne’ebé presiza evita mak violénsia ne’ebé presiza selebra.

Biban ne’e, líder nasionál ne’e husu ba jornalista timor-oan hotu atu fó sai notísia ruma tenke iha regra deontolójika, étika, objetividade, neutralidade, imparsialidade, no korajen.

“Klaru la’ós jornalista hotu tenke hakerek kona-ba polítika, ekonomia, maibé mídia ko’alia buat oinoin hanesan kultura, desportu, medisina, dezenvolvimentu tanba jornalista ida bele sai ekonomista ne’ebé haree liu ba ezemplu ekonomia iha aspetu barak no mídia bele kontribui maka’as,” nia fó hanoin.

Tuir ajenda iha sesta (16/10) hosi tuku 08:00 to’o kalan, atividade ne’ebé realiza maka misa iha Igreja Balibo, programa kafé dadeer, debate públiku kona-ba ‘papél mídia iha konstrusaun Estadu’ ne’ebé sei envolve oradór lima, jogu amizade, live talk show ho tópiku ‘papél mídia iha konstrusaun Estadu (asegura pás no promosaun direitu umanu)’, kari aifunan no sunu lilin, atribuisaun prémiu jornalizmu ba Pás Maria Gorreti, anúnsiu manan na’in no apresiasaun ba josnalista.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here