Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 16 outubru 2020 (TATOLI)—Diretór Ezekutivu Forum ONG Timor-Leste (FONGTIL), Daniel Santos do Carmo, informa tuir relatóriu hosi Global Hunger Index (GHI) ka Insdise Hamlaha Global hatudu katak Timor-Leste sai segundu pozisaun ameasa hamlaha iha mundu.

“Relatóriu hosi Global Hunger Index ka Indise Hamlaha Global hatudu katak ita (Timor-Leste) hola pozisaun segundu ameasa hamlaha iha mundu,” Daniel Carmo ba jornalista sira hafoin partisipa semináriu sosializasun ba seguransa ai-han ba membru no Rede ONG, iha salaun parókia São José Katedral Vila-verde, Dili, sesta ne’e.

Tanba ne’e, nia hateten, sosiedade sivíl sira husu Governu atu halo intervensaun ba seguransa ai-han nutrisaun menus iha nasaun doben ida-ne’e.

“Ita hotu-hotu tenke advoga no oinsá ita-nia Governu halo intervensaun maka’as para garante ba seguransa ai-han nutrisaun atu iha nafatin,” nia hateten.

Entretantu, Koordenadór Gabinete Apoiu Primeiru-Ministru, Filipe da Costa, informa katak Timor-Leste hamlaha 36% maihosi Munisípiu Baucau,  Bobonaro, Dili, Ermera, Manufahi no Rejiaun Administrativa Espesial Óe-Cuse Ambeno (RAEOA).

Nia hateten, maske Governu halo investimentu boot liu iha ba rai ida-ne’e dezde priemiru Governu Konstituisionál no iha parseiru barak ne’ebé mak barak atu apoiu hodi hakotu inseguransa ai-han no nutrisaun iha Timor-Leste.

“Ita iha ajénsia ONU barak maibé problema ida-ne’e sei boot entaun desizaun Governu foti mak atu adere scaling up nutrition ka aumenta nutrisaun ne’e desizaun di’ak ida katak aleinde servisu hamutuk ho ajénsia sira iha rai-laran maibé presiza mós servisu hamutuk ho nasaun sira ne’ebé mak sai ona membru scaling up nutrition,” Kooredenadór ne’e haktuir.

Governu iha polítika ne’ebé atu hadi’a para oinsá mak populasuan moris iha aihan nutrisaun ne’ebé lato’o para bele eleva liután no asesgura asesu ba aihan liuliu hadi’a infraentrutura bázika.

“Ho ida ne’e ita tenke hanorin sira oinsá atu utiliza ai-han ho di’ak no asegura estabilidade ai-han iha tinan tomak ninia. Iha períodu tuir mai ita tenke investe maka’as no presiza hadi’a inan ho oan liuliu asesu ba fasilidade saúde no fó hahan nutritivu ba bebé,” nia esplika.

Nia dehan, membru Governu sira agora iha planu ne’ebé mak kapaas tebes no hahú ona submete sira-nia planu Orsamentu Jerál Estadu (OJE) 2021 ba iha Parlamentu Nasionál.

Hein katak, nia hateten, OJE ne’e liu entaun Timor-Leste tenke investe maka’as iha área infraestrutura bázika, produsaun ai-han, hanorin oinsá utiliza no asegura ai-han ba tinan tomak nian,” nia hateten. 

Semináriu ne’e realiza, nia dehan, ho objetivu oinsá Timor-Leste haree auditóriu sosiál ho ONG sira no bele mós halo auditóriu ba polítika programa Governu nian liga ho asuntu seguransa no nutrisaun tanba nutrisaun sai hanesan problema boot no grave iha Timor-Leste.

Jornalista: Osória Marques

Editor: Cancio Ximenes

1 KOMENTÁRIU

  1. ONG FONGTL labele nakdedar ho relatoriu GHI, FONGTIL halo ona peskiza konaba motivu husi hamla tanba saida. Populasaun husi municipiu hira mak agora la acesu ba ai han. Kuandu halo seminariu ka worshop tenki bazea ba resultadu peskiza labele uza ema ria relatoriu hanesan materia ba iha konfrensia. Papel ONG FONGTIL ne mak saida.

HAKEREK NO HATÁN

Please enter your comment!
Please enter your name here