Ekipa TANE konsumidór fahe brosura ba estudante UNPAZ, sesta (16/10). Imajen Tatoli/Arminda Fonseca

DILI, 16 outubru 2020 (TATOLI)–Asosiasaun TANE Konsumidór fahe informasaun ba estudante Universidade da Paz (UNPAZ), Fakuldade Direitu, kona-ba problema konsumidór sira nian.

Prezidente TANE Konsumidór, António Ramos da Silva ‘Naikoli’, hateten atividade ne’e bazeia ba direitu konsumidór ne’ebé hatuur ona iha lei númeru 8/2016 hodi fó protesaun ba konsumidór no artigu 8 ne’ebé mensiona formasaun no edukasaun ba konsumu.

“Objetivu hosi asaun ne’e atu sensibiliza direitu konsumidór ne’ebé iha lei hakerek ona, tanba ne’e agora presiza sensibiliza atu nune’e ema bele hatene lala’ok konsumidór. Ba asuntu ne’e ita hili fakuldade direitu,” Dirijente ne’e dehan ba Agência Tatoli, resintu UNPAZ, Manleuana, sesta ne’e.

Atu promove no implementa regulamentu ne’e ho di’ak iha Timor-Leste, asosiasaun ne’e hili fakuldade direitu tanba estudante sira estuda matéria direitu.

“TANE iha mekanizmu atende prekupasaun konsumidór liuhosi atividade ne’e ba estudante sira no mós nu’udar konsumidór ida, nune’e bele transmite informasaun ba família, komunidade no Estadu,” nia realsa.

Estudante nu’udár mekanizmu atu atende konsumidór sira no bele solusiona problema, tanba ne’e bainhira respeitu direitu konsumidór ho di’ak maka direitu ekonómiku fásil dezenvolve di’ak liután. 

Iha fatin hanesan, Pró-reitór asuntu akadémiku UNPAZ, Joanino Araújo, apresia serbisu TANE.

“Ami agradese asosiasaun ne’e tanba fahe informasaun importante ba ami-nia estudante sira no ita presiza duni atu hatene,” nia subliña.

Akadémiku ne’e apela ba estudante sira katak informasaun ne’ebé hetan tenke ajuda fahe ba maluk sira ne’ebé seidauk iha koñesementu ba direitu konsumidór.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here