Treinadór AD. SLB, Efren Jeronimo (faru metan). Imajen/Mídia FFTL

GLENO, 16 outubru 2020 (TATOLI) – Treinadór AD. SLB, Efren Jeronimo no treinadór Sporting Clube de Timor,  Moises da Silva, la satisfás ho desizaun árbitru Francisco Pereira, tanba parte rua konsidera desizaun árbitru nian iha kampu la tuir  saida mak iha.

Notísia Relevante :  AD. SLB Vs Sporting, “Makikit Laulara” manan 6-3

“Ha’u sente kontente tebes iha jogu ohin ne’e, klima mak halo jogu lao ladún furak tiha. Jogu ohin ne’e ho tensaun ne’ebé maka’as. Ekipa  hotu buka vitória, maibé la’ós buka atu tebe ema. Árbitru, ha’u la’ós atu korrije sira, maibé tenke haree hodi foti desizaun. Sira tenke brani foti desizaun ne’ebé loos, se lae, ita halo aleza ba jogadór hotu,” dehan Efren liuhosi konferénsia imprensa hafoin jogu termina iha Estádiu Gleno, ohin loraik.

Nia dehan, loloos árbitru tenke foti desizaun ba jogadór Sporting nian hirak ne’ebé tebe jogadór SLB hosi kotuk bainhira sira lori hela bola.

“Ha’u la preokupa. Maibé árbitru tenke brani foti desizaun. Desizaun iha sira-nia liman, la bele halo beibeik hanesan ne’e,” treinadór ne’e afirma.

Treinadór Sporting Clube de Timor, Moises da Silva (hatudu liman). Imajen/Mídia FFTL

Iha fatin hanesan treinadór Sporting, Moises da Silva hateten, desizaun árbitru iha kampu laran la’ós buat foun sempre mosu beibeik ona bainhira jogu.

“Fallansu hirak ne’ebé sira halo la’ós buat foun, sempre halo beibeik. Nune’e komisáriu jogu dehan labele protesta. Ha’u la hatene ita nian Timor ne’e. Iha Europa ema bele protesta árbitru, maibé ita nian labele fali. Estraga tiha ami nia jogu ne’e ami tenke protesta ka ita haree sira ne’e oin-seluk fali,” Moises hateten.

Tuir nia, lakon ba sira normal tanba diferente iha kualidade ekipa, tanba haree hosi fasilidade ba Sporting limitadu no SLB iha kbiit ne’ebé natoon hodi hatudu duni jogu ne’ebé kualidade.

Árbitru Francisco Pereira konfesa katak, desizaun ne’ebé nia foti bazeia ba regulamentu no hanesan ema naksalak sira ne’e dala ruma mosu mas la’ós ho intensaun.

“Ha’u foti desizaun ne’e bazeia ba ita hanesan ema iha nia frakeza no limitasaun. Ha’u iha matan rua la’ós matan barak atu kontrola jogadór 22 iha kampu laran ne’e hotu. Desizaun ne’ebé ha’u foti tuir regulamentu ne’ebé iha. Desizaun ha’u foti bainhira ha’u haree mak foti, se ha’u la haree ha’u labele foti jogu kontinua lao,” nia konfirma.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here