Ministériu Saúde hahú fali kampaña kombate lumbriga hodi fahe aimoruk ba estudante sira iha Eskola Nobel Pás, Kintal Boot, ohin. Imajen Egas Cristovão

DILI, 16 outubru 2020 (TATOLI)-Xefe Sentru Saúde Guisarudu Hatulia B, Munisípiu Ermera, Maria Madalena Leto Mali, informa hahú fulan-agostu to’o outubru 2020 enfrenta problema falta ai-moruk ba moras lumbriga mak hanesan albendazole, pirantel pamoat, mebendazole.

“To’o agora estoke seidauk iha maski pedidu ba ona nasionál maibé Farmasia Sentrál mós, laiha,” Madalena Leto Mali, informa asuntu ne’e ba Tatoli, via telefone iha sesta ne’e.

Notísia Relevante :MS inagura Sentru Saúde Hatulia B

Nia dehan Profisionál Saúde sira labele fó tratamentu saúde ba pasiente ho moras lumbriga tanba laiha estoke.

Moras lumbriga iha tipu oioin ne’ebé dala barak afeta ba labarik no inan isin-rua sira maka lumbriga fita, Ancilostomíase, Minhocas, Worms pulseira ka lumbriga kadeli.

Metodu prevensaun  ba moras lumbriga iha meius oioina maka tenki garante ambiente seguru no moos, rai naan matak no ikan iha fatin seguru no tein to’o tasak didi’ak,  fase hahán halo moos antes konsumu, fase liman ho disiplina  depois sintina, antes tein no han, ba sira ne’ebé sofre ona moras lumbriga, tenki troka roupa laran, hena toba lorloron durante hetan infeksaun, evita la’o ain tenki uza sinelus no probiu atu la’o ain tanan hodi sama diretamente rai. 

Sintoma pasiente lumbriga maka, kolen, kabun moras, kabun bubu, laran sa’e, muta, diaréa, laiha vontade atu han.

Iha parte seluk nia relata durante fulan-setembru pasiente ho moras infeksaun vias respiratóriu  hamutuk 241, feto 81 no mane 160, diaréa 138, mane 73 no feto 65.

”Moras Ispa ne’e afeta husi rai rahun maka’as rai maran no mós anin bo’ot, ho ida ne’e maka moras ISPA ne’e sa’e maka’as iha Sentru Guisarudu inklui mós diaréa ne’e impaktu husi hahán ne’ebé mak prepara ladun moos no labarik sira la fase liman entaun diaréa ne’e mosu ba labarik fulan neen to’o tinan rua ,” nia hateten.

Husi totál pasiente diárea 138 ne’e, labarik na’in rua obrigadu tenki evakua ba Sentru Saúde Ermera depois kontinua ba Ospitál Nasionál Guido Valadares (HNGV-sigla portugés) tanba ho kondisaun grave.

Notísia Relevante :MS halo konsulta ba pasiente 600-resin iha Hatulia

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here