Prezidenti Parlamentu Nasional, Aniceto Guterres Imajen Tatoli/Antonio Goncalves

DILI, 16 outubru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten Governu presiza iha polítika hakiak no haburas iha setór agrikultura hodi bele garante seguransa alimentár iha Timor-Leste.

Aniceto Guterres ko’alia asuntu ne’e iha ámbitu selebrasaun loron mundiál ai-han ba dala-75 iha Sentru Konvensaun Dili (CCD-sigla portugés), sesta ne’e.

Prezidente Parlamentu Nasionál, esplika iha aspeitu boot rua iha temátika komemorasaun loron mundiál alimentasaun, ida relasionamentu no kombinasaun armoniza entre potensiál naturál sira iha ámbitu iha sosiedade ho sustentabilidade, rua enkuadramentu povu Timor-Leste nia realidade moris.

“Fonte ne’ebé fornese ai-han ba ita ema-nia moris mai hosi animál, vegetál sira no mós mineral sira-ne’ebé disponivel iha natureza. Ita ema atribui ho kapasidade no responsabilidade ba produtu sira-ne’ebé disponivel ona hosi natureza. Presiza polítika hakiak no haburas katak hatudu ita ema-nia intervensaun, ita ema nia partisipasaun hodi hetan saida mak ita presiza ba consume,” Aniceto Guterres hato’o iha ninia diskursu iha CCD, Dili, sesta ne’e.

Nia fundamenta, hakiak no baburas ai-han ne’ebé nutritivu, demostra ema-nia kapasidade seletivu ba ai-han ne’ebé ema  tenke konsume. Ai-han nutritivu hodi sustenta jerasaun futuru ne’ebé saudável, nu’udar deklarasun ida-ne’ebé afirma ema-nia vontade no hatudu ema-nia kompromisu ba jerasaun futuru ne’ebé merese moris iha kualidade saudável.

“Aleinde setór sira-ne’ebé kontribui ba ema-nia kualidade moris, iha kontestu ida-ne’e setór agrikultura mak sai pilár importante iha polítika kuda, hakiak no baburas ai-haan nutritivu, promove agrikultura sustentável, asegura ai-haan, halakon hamlaha no hadi’a nutrisaun,” nia dehan.

Prezidente Parlamentu Nasionál ne’e haktuir, tinan 20 ona setór agrikultura seidauk hatudu rezultadu ne’ebé garante auto-sufisiente ai-haan, pelo menos povu Timor-Leste bele han ai-han ne’ebé produs rasik hosi produsaun agríkola iha Timor-Leste.

Tuir nia, ema hotu-hotu direitu ba moris no iha direitu ba ai-han ho nutrisaun hosi ai-han nutrisionál nu’udar direitu fundamentál ba sustenta funsionamentu ema-nia organizmu hodi kontribui ba kualidade moris iha aspeitu hotu-hotu inklui ambiente natureza ne’ebé fornese alimentu esensiál sira ba ema-nia moris.

Nia hatutan, hosi ambiente natureza ne’ebé oferese ai-han hanesan rai, minerál, anin, animál ba sustenta ita-nia moris nu’udar partisipasaun ema-nian ho nia kapasidade tomak iha jestaun utilizasaun rekursu hirak ne’e determina ema-nia kualidade moris.

“Udan mak haburas hodi sustenta hamutuk ita-nia asaun mak ita-nia futuru. Ne’e mak tema mundiál ba komemorasaun loron mundiál ai-han iha tinan ida-ne’e. Responde ba temátika ida-ne’e Timor-Leste fó einfaze ba udan hakiak no haburas ai-haan nutritivu hodi sustenta jerasaun future ne’ebé saudável,” nia hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here