Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 16 outubru 2020 (TATOLI)Ministru Koordenadór Asuntu Ekonómiku (MKAE), Joaquim Amaral, informa ministériu ne’e sei hasai dekretu ministeriál hodi mensiona lista produtu ne’ebé sei sosa hodi distribui ba populasaun iha programa Cesta Bázika.

“Produtu iha ona lista no dekretu ministeriál sei hasai iha semana oin. Dekretu ministeriál ne’e sei regula lista sasán ne’ebé atu hola. Ita-nia preparativu la’o hela no faze finál sei kumpre kalendáriu ne’ebé iha ona,” Ministru Joaquim informa ba Agência Tatoli, iha Sentru Konvensaun Dili (CCD, sigla portugés), sesta ne’e.

Notísia Relevante: Governu estabelese medida apoiu ba família liuhosi atribuisaun cesta bázika

Governante ne’e fó sai katak, produtu ne’ebé sei distribui iha programa kurtu prazu ne’e maka hanesan ai-han hanesan batar, hare, no produtu orgániku seluk tan, ne’ebé Governu fó liu atensaun ba produtu agrikultór sira.

“Cesta Bázika sei mai hosi produtu Timór no ita-nia agrikultór maka sei prodús, maibé la taka dalan se produsaun ai-han sira ne’ebé iha la to’o, entaun ita sosa hotu ai-han ne’ebé iha merkadu lokál,” nia esplika.

Durante distribuisaun, Governu sei fó oportunidade  ba empreza  nasionál sira hodi halo transportasaun produtu sira to’o komunidade sira nia fatin.

“Governu kria polítika ida, atu organiza setór privadu sira bele partisipa iha prosesu kompra no halo distribuisaun tanba empreza barak liu, maibé prosesu kontratu seidauk finál no númeru empreza sira mós seidauk fixu,” nia akresenta.

Tuir Ministru Koordenadór ne’e, empreza sira ne’ebé atu partisipa iha prosesu ne’e maibé tenke iha kapasidade finanseira no lojístika tanba la’ós de’it atu sosa, maibé tenke tula to’o komunidade.

Ema hotu iha territóriu sei hetan direitu hanesan iha programa ne’e, tanba ne’e Governu presiza mobiliza rekursu barak.

“Medida ne’e universál no ita tenke respeita regra ba família sira tanba sira iha direitu atu hetan ho medida distribuisaun produtu depende ba xefe família liuhosi ficha da família”, Joaquim Amaral hateten.

Tuir kalendáriu, faze distribuisaun produtu ba populasaun iha territóriu tomak sei realiza imparsiál iha semana daruak dezembru.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Governu sei implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho cesta bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here