MInistru Edukasaun Juventude no Desportu, Armindo Maia. Imajen Tatoli/Egas Cristovão

DILI, 16 outubru 2020 (TATOLI)—Ministru Edukasaun Juventude no Desportu (MEJD), Armindo Maia, informa Membru Polisia Nasionál Timor-Leste hamutuk na’in 26 maka daudaun ne’e fó hela seguransa ba prosesu impresaun matéria ezame nasionál ne’ebé maka hala’o husi Kompañia Sylvia Xerox Timor-Leste.

Tuir kontratu ne’ebé hala’o entre MEJD ho Kompañia Sylvia katak prosesu impresaun hahú ona iha loron 10 fulan-outubru no sei  ramata iha loron 13 fulan-novembru.

Notísia Relevante :MEJD kontrata Sylvia imprime matéria ezame nasionál

Projetu impresaun matéria ezame nasionál ne’e, gasta orsamentu Estadu hamutuk rihun $385.109.

“Iha fatin impresaun ne’e ita-nia polisia na’in 26 mak pronto ona fo apoiu seguransa atu asegura prosesu impresaun ba pontus ezame nasionál, Sira sei mantein iha ne’e to’o prosesu impresaun ramata, ne’e duni area ida (Kompañia Sylvia) ne’e sei hetan seguransa to’o prosesu impresaun ramata,” nia dehan ba jornalista sira hafoin halo observasaun ba prosesu impresaun matéria ezame nasionál iha Sylvia, Caicoli Dili, sesta ne’e.

Durante prosesu ne’e la’o husi parte Polisia sei la fó kualker autorizasaun ba vizitante sira atu tama ba sala imprime.

“Tanba seguransa ne’ebé mak koloka iha Kompañia Sylvia printing ne’e fahe ba parte rua, iha liur responsabiliza husi Polisia no iha laran parte Kompañia inkui mós husi MEJD,” nia hateten.

Entretantu, baseia ba orariu ezame nasionál sei hala’o iha loron 16-21 iha fulan-novembru.

Notísia Relevante :Sylvia sei finaliza prosesu impresaun matéria ezame nasionál iha novembru

Jornalista: Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here