Ministru Asuntu Parlamentár no Komunikasaun Sosiál, Francisco Jerónimo, haree fasilidade no lala’ok serbisu iha sentru Informasaun Leohitu, postu administrativu Balibo, munisípiu Bobonaro, sesta (16/10). Imajen Tatoli/Antónia Gusmão

BOBONARO, 16 outubru 2020 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, ho komitiva iha sesta ne’e, vizita sentru informasaun suku Leohitu, postu administrativu Balibo, munisípiu Bobonaro hodi haree kondisaun serbisu.

Durante vizita governante ne’e husu sentru informasaun ne’e partilla informasaun relasiona ho prevensaun surtu COVID-19 ba komunidade Leohitu.

“Bele fahe informasaun prevensaun COVID-19 ba komunidade tanba daudaun ne’e Governu esforsu hela atu prevene moras. Ha’u husu aleinde fó informasaun seluk, bele fahe kona-ba moras ne’e,” Ministru Francisco hameno ba responsável sira.

Durante vizita, membru ezekutivu ne’e rona preokupasaun jerente iha sentru ne’e, ne’ebé hateten durante hala’o knaar rekolla informasaun no partilla ba públiku, sempre hasoru difikuldade, liuliu ba transporte tanba distánsia hosi aldeia sira ba suku Leohitu dook malu, tanba ne’e presiza la’o ain ho distánsia maizumenus kilometru lima, ne’ebé difikulta divulga informasaun ho lalais.

“Ha’u mai haree sentru informasaun ne’e no sira aprezenta situasaun ne’ebé sira hasoru, ha’u simu preokupasaun sira ne’e,” nia akresenta.

Sentru informasaun Leohitu estabelese hosi Sekretaria Estadu Komunikasaun Sosiál (SEKOMS), liuhosi programa ‘Naroman ba Suku’, ho objetivu bele transmite informasaun ba populasaun tantu informasaun hosi suku nian ba nasionál no informasaun hosi Governu sentrál nian ba suku.

Tanba ne’e, governante ne’e hateten, programa ne’e benefisia tebes ba suku, tanba joven sira bele hatudu kreatividade no hamosu programa ruma, liuliu informasaun sira ne’ebé presiza hato’o ba komunidade hanesan potensialidade suku nian no prevensaun moras COVID-19, ne’ebé bele ajuda Governu halo desizaun.

Iha fatin hanesan, Xefe Sentru Informasaun Leohitu, Herman Pereira, hateten sentru ne’e estabele ona iha tinan kotuk ho maneira fahe informasaun liuhosi kanál rede sosiál Facebook no atividade suku fahe liuhosi Youtube.

“Populasaun balun la uza telefone ho sistema operasaun android, ne’ebé ami habelar informasaun diretamente ba sira,” nia akresenta.

Maski nune’e, Responsável sentru ne’e sente haksolok tebes ho prezensa MAPKOMS, ne’ebé hatudu Governu sentrál hakbesik-an ba sira no nia konsidera ida-ne’e nu’udar pasu importante ida.

Pasoál ne’ebé hala’o kna’ar iha sentru ne’e hamutuk na’in-neen, kompostu hosi mane lima no feto ida.

Iha vizita ne’e, Ministru Francisco entrega mós revista MAPKOMS ba autoridade lokál no Xefe sentru informasaun Leohitu.

Durante vizita, akompaña mós hosi Vise Ministra Turizmu, Komunitária no Kultural, Inâcia da Conceição Texeira, kargu xefia MAPKOMS no SEKOMS), Prezidente interinu Agência Tatoli, I.P, Manuel Pinto, Prezidente RTTL,E.P, Francisco da Silva Gary, entidade balun hosi Institutu Defeza Nasionál (IDN) no  administradór postu administrativu Balibo.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here