Aktividade negosiante fa’an produtu lokál iha bazar tradisionál iha kapitál Dili, sesta (16/10). Imajen Tatoli/António Gonçalves

DILI, 16 outubru 2020 (TATOLI)-Ministériu Agrikultura no Peska (MAP) liuhosi Diresaun Nasionál Seguransa Alimentár hamutuk Konsellu Nasionál Seguransa Soberania Ai-han no Nutrisaun iha Timor-Leste (KONSSANTIL) no Programa Ai-han Mundiál (WFP, sigla inglés) komemora loron mudiál ai-han ba dala-40 iha nível globál no dala-13 iha Timor-Leste.

Iha diskursu, Ministru Agrikultura Peska, Pedro dos Reis, refere ba dadus índise ai-han mundiál ne’ebé hatudu katak timor-oan 36% sei infrenta inseguransa ai-han no mal nutrisaun iha Timor-Leste.

“Atu hakotu hamlaha no mal nutrisaun, Estadu presiza investe maka’as no presiza esforsu koletivu hosi liña ministeriál hotu no haree ba multi setorál no multi dimensionál atu serbisu hamutuk no atinje dezenvolvimentu sustentável ne’ebé Estadu trasa ona,” Ministru dehan iha ámbitu komemorasaun loron mundiál ne’e iha Sentru Konvesaun Dili (CCD, sigla portugés), sesta ne’e.

Iha fatin hanesan, Xefe misaun WFP iha Timor-Leste, Dangeng Liu, dehan objetivu selebrasaun ne’e atu promove konsiénsia asaun ema hotu kona-ba hamlaha no oinsá hetan ai-han saudável.

Nune’e mós, Prezidente Parlamentu Nasionál (PPN), Aniceto Longinhos Guterres Lopes, husu ba Governu no sidadaun sira hodi fó prioridade ba setór agríkola hodi kontinua seguransa ai-han.

Xefe Komisaun Organizadora ba eventu no Diretora Jerál MAP, Odete Maria do Céo Guterres, relata katak programa ne’e organiza rasik hosi MAP inklui ministeriu seluk ne’ebé enkorpora iha KONSSANTIL no hetan apoiu hosi parseiru dezenvolvimentu sira iha Timor-Leste.

Eventu loron internasionál ne’e hetan finansiamentu hosi Diresaun Nasionál Seguransa Alimentár $2.000,  Ministeriu Turizmu, Komérsiu no Indústria (MTKI) $3.500,  apoiu hosi WFP $6.500, Food Agriculture Organization (FAO) $1.600, Mercy Corps $400,  TOMAK $150, USAID $500, ho totál orsamentu ba atividade ne’e hamutuk $15.350, ne’e osan ne’e hotu atu finansia konsumu, aluga salaun CCD, preparasaun kamizola no seluk tan.

Tema ba komemorasaun loron mundiál ai-han ba tinan ne’e maka ‘kuda, hakiak no haburas ai-han nutritivu hodi sustenta jerasaun futuru’.

Eventu ne’e rasik sei realiza durante loron rua, hahú ohin no aban iha Jardin BJ Habibie.

Seremónia ne’e loke hosi PPN Aniceto Guterres no partisipa hosi Ministru Koordenadór Asuntu Ekonómiku, Sekretáriu Estadu Formasaun Profisionál no Empregu no membru Governu seluk tan, korpu diplomátiku ne’ebé akreditadu iha Timor-Leste, parseiru dezenvolvimentu, akadémiku no entidade seluk tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here