Debate públiku iha ámbitu komemorasaun tinan 45 trajédia Balibo Five komemora iha Balibo, sesta (16/10). Imajen Tatoli/Antónia Gusmão

BOBONARO, 16 outubru 2020 (TATOLI)--Eis Prezidente Repúblika, José Ramos Horta, ‘krítika’ produsaun nota imprensa ofisiál (komunikadu imprensa) hosi Governu ne’ebé publika liuhosi meiu rede sosiál.

Premiadu nobel pás ne’e nota katak durante ne’e Governu liuhosi ofisiál mídia sira bainhira fó sai komunikadu ofisiál, halo ema baruk lee tanba la akompaña ho fotografia relevante no vídio badak relasiona ho atividade.

“Plataforma sosiál ne’e vantajen ba ita no Governu, maibé problema maka Governu kuaze iha nasaun hotu ladún iha kreatividade no laiha imajinasaun halo públikasaun ba atividade ho kreatividade, ne’e halo ema baruk no komunidade ofisiál sira ne’e ladún lee,” José Ramos Horta hateten iha debate públiku kona-ba ‘papel mídia iha konstrusaun Estadu’ iha ámbitu komemora tinan 45 trajédia Balibo Five iha postu administrativu Balibo, munisípiu Bobobaro, sexta ne’e.

Tanba ne’e, eis diplomata ne’e sujere Governu tenke fó sai informasaun ofisiál ho kreatividade jornalíztiku.

“Kreatividade ho imajen iha informasaun, ne’ebé bele domina iha plataforma sosiál hodi la fó fatin ba nakar-teen sira ne’ebé bosok tun bosok sa’e. Ida-ne’e la’ós Governu Timór de’it maibé rai barak mós hanesan,” nia akresenta.

Maski nune’e, nia konsidera rede sosiál hanesan Facebook importante tebes hodi akumula ema hotu hato’o hanoin no liuhosi plataforma ne’e bele fasilita komunikasaun interativu.

“Sosiál mídia impotante ba mundu no ita hotu tanba fasilita komunikasaun, ezemplu uluk kuandu ha’u haree jornalista estranjeiru ruma hakerek buat arbiru halo Timór nia naran ladi’ak, ha’u hakerek ba sira tenta publika maibé agora ha’u nein liga no ha’u fó resposta ba sira iha ha’u-nia pajina Facebook,” nia haktuir.

Iha fatin hanesan, Ministru Asuntu Parlamentár no Komunikasaun Sosiál (MAPKOMS), Francisco Jerónimo, rekoñese katak durante ne’e Governu sira laiha kreatividade bainhira fó sai informasaun ofisiál sira iha pájina Governu.

“Ha’u konkorda tebes no presiza duni kreatividade governante sira atubele jere, tanba ne’e mak ami ne’ebé toma konta halo nafatin koordenasaun no enkontru regulár ho media officer kada ministériu to’o munisípiu, atu nune’e bele haree saida mak bele halo no labele fó marjen barak liu ba buat ne’ebé ladi’ak,” nia dehan.

Governante ne’e informa, Ministériu Asuntu Parlamentár no Komunikasaun Sosiál (MAPKOMS) planea ona atu orienta kargu xefia sira ne’ebé toma ba área komunikasaun sosiál iha ministériu atu halo serbisu sira di’ak liután iha futuru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here