Ilustrasaun isin-rua

DILI, 16 outubru 2020 (TATOLI)—Antigu Alunu Austrália iha Timor-Leste, Umbelina Maria Soares Rodrigues, hateten jovens adolesente ne’ebé gravida sedu sei hetan risku boot bainhira atu partu tanba bele mosu anemia no mós kazu mortalidade ba inan no bebé.

Baseia ba dadus peskiza demográfiku 2016 hatudu katak feto adolesente ho tinan 15 to’o 19 barak maka kaben sedu no iha ona oan. Husi númeru ne’e Rejiaun Administrativa Oe-Cusse Ambeno iha pursentu 10.4 (%), depois Munisípiu Liquiça, Bobonaro no Covalima.

Notísia Relevante :Vasina HPV prevene mosu kankru servikál

”Risku isin rua ne’ebé akontese ba adolesente sira maka ne’e, sira tenke para nia eskola, risku ba saúde inan ne’e  maka’as tebes bele iha  ran menus no anemia, no bele afeta mó ba bebé mate iha sira-nia kabun laran no sira mós bele mate  tanba sira-nia idade sei Adolesente hela,” dehan nia durante sai oradór iha semináriu ho tema Saúde Seksuál no Reprodutivu ba Joven Adolesente iha Novo Turizmu, sesta (16/10).

Tanba ne’e, Governu hamutuk ho Timoroan hotu tenki iha kompromisu polítika atu fó atensaun seriu liliu halo promosaun kona-ba saúde seksuál no reprodutivu hodi hafanun konsiénsia ema nian liliu joven feto sira atu evita kaben sedu tanba fó mós impaktu ba problema sosiál no ekonomia.

“Isin-rua ne’ebé akontese menus husi idade 19 ne’e  iha risku ne’ebé bo’ot tebtebes ba sira-nia saúde, adolesente sira isin-rua ho idade menus husi 19  sira iha posibilidade bo’ot atu bele mate,”  nia dehan.

Iha parte seluk, nia esplika iha tinan 2019, deteksaun ba kazu HIV/SIDA pursentu 30 da’et ba joven ho tinan 15 to’o 24, joven barak mós sofre moras mentál hanesan depresaun, desturbasaun no ikus hanoin maka konsumu droga.

“Ita Hare’e sensu 2015 hatudu katak 20% hósi totál populasaun Timor-Leste  maihosi  adolesente  ho idade 10 to’o 19, no kuaze 42%  ne’e ho idade 15 to 24 metade husi populasaun Timor ne’e menus husi  idade 25  maibé problema ba adolesente sira mak koñesimentu menus kona-ba sira-nia saúde reprodutiva, sira la hatene bainhira maka sira atu iha menstruasaun  no bainhira maka  menstruasaun atu para no sira mós la hatene,” nia hateten.

Notísia Relevante :Feto Sira Kaben Sedu Kontribui ba Kazu Mortalidade Inan no Labarik

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here