Produtu lokál iha bazar tradisionál Dili, sesta (16/10). Imajen Tatoli/António Gonçalves

DILI, 16 outubru 2020 (TATOLI)-Diretora Jerál Ministériu Agrikultura no Peskaa (MAP), Maria do Céu Guterres, otimista Timor-Leste sei la tama ba zona risku hamlaha tanba daudaun produsaun ai-han naton atu hatan ba nesesidade populasaun.

“Ha’u la haree amesa ba hamlaha tanba oras ne’e ita prodús hahán naton hela no importa de’it foos no laiha importasaun ba hahán seluk. Batar, fore keli no fore mungu agora prodús barak,“ Diretóra MAP dehan iha Sentru Konvesaun Dili (CCD, sigla portugés), sesta ne’e.

Nia konsidera estudu hosi Índice Global da Fome (IGF) ne’ebé hatudu katak iha tinan 2020 ne’e, Timor-Leste okupa fatin daruak ne’ebé reprezenta 106 hosi nasaun 107 ho pontuasaun 37,6 iha nível alarme hamlaha, presiza haree didi’ak filafali.

“Ami konsidera ne’e estudu, tanba ne’e presiza haree hosi aspeitu hotu ne’ebé kontribui no mós aspeitu xave prinsipál hanesan fatór ekonomia ne’ebé ita laiha risku ba hamlaha no sei la hetan hamlaha,” Diretora ne’e otimista.

Notísia Relevante: http://tatoli.tl/pt/2020/10/16/timor-leste-e-o-segundo-pais-com-mais-fome-no-ranking-do-igf-de-2020/

Tuir nia, tinan ne’e produsaun sa’e nafatin maski seidauk iha rezultadu finál hosi levantamentu no analiza dadus ba tinan 2020.

“Prosesu levantamentu seidauk hotu no daudaun ita sei kaer ba 2019 ninian.  Iha tonelada 76.000 hare maka bainhira ita konverte ba foos bele sai 40.000,” nia katak.

Dadus MAP ba kolleta segunda époka seidauk konklui no produsaun sei la’o nafatin.

“Ami foin kolleta semana kotuk iha rai ektare 3.000 iha Larisula no foin semana rua liubá iha Bebui, entaun ami presiza fó dadus ne’e elaboradu ona,” nia informa.

Nia dehan, dadus hosi índise globál la grave, maibé nu’udár baze atu kontinua hasa’e produsaun iha rai-laran no investe maka’as iha setór agíkola.

“Ita ameasadu maibé la’ós grave tanba sei iha país hanesan Áfrika ne’e iha zona mean reprezenta 3,5% to’o 36%, maibé Timor-Leste nia sei azul iha mapa, índise ne’e hatudu sinál menus hosi 2,5,” nia akresenta.

Timor-Leste tama iha kategoria hamlaha liu, maibé tuir Odete Maria parte MAP haree liu ba parte nutrisaun tanba dadus nutrisaun Timor-Leste sei atinje 46%.

“Konserteza dadus mal nutrisaun implika ba ai-han, maibé ha’u labele hateten katak ita sei ameasa ba hahán no hahán sei laiha tanba daudaun produsaun sei naton no ita la’ós konsume de’it etu maibé mós batar, fehuk ai-farina, no seluk tan,” nia fó hanoin.

Liuhosi analiza ne’ebé iha, ninia implikasaun ba ekonomia tanba bainhira hakarak han di’ak, tuir sasukat estudu globál, ema ida presiza $211 ba kada fulan no kada família iha ema na’in-haat de’it.

“Ita Timor, família ida iha ema barak (liu haat) no ita-nia saláriu mínimu sei $115 no dalaruma ema ne’ebé ho saláriu mínimu maka ninia membru família barak liu,” nia akresenta.

Tanba ne’e, nia konsidera implikasaun labele haree de’it ba produsaun maibé interligadu ba impaktu sosiu-ekonómiku hotu.

“Ema-nia saláriu kiik, entaun nia laiha forsa atu sustenta ema barak no iha membru família barak, maibé haree ba ema riku sira oan iha ida ka rua de’it, no ema ne’ebé hela ho ema riku sira la barak,” Diretora ne’e observa.

Tuir analiza ne’ebé maka IGF halo, ema ida bainhira hakarak moris di’ak saláriu mínimu tenke $211 hodi bele konsumu hahán di’ak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here