iklan

LAUTÉM, MUNISÍPIU, SEGURANSA

Asidente tráfegu iha Lautém rezulta ema na’in-hitu mate

Asidente tráfegu iha Lautém  rezulta ema na’in-hitu mate

Asidente balun ne'ebé akontese iha Postu Administrativu Lospalos, Munisipiu Lautem, Imajen/foti hosi Facebook

LAUTÉM, 16 outubru 2020 (TATOLI) – Durante janeiru to’o outubru, tinan ne’e, Polísia Unidade Tránzitu Rodoviáriu Munisípiu Lautém, rejista kazu asidente tráfegu hamutuk 16. Hosi kazu ne’e rezulta vítima na’in-hitu (7) mate no seluk kanek todan ho kamaan.

Notísia Relevante : Fulan tolu, kazu krime 50 akontese iha Lautem

Komandante PNTL Munisípiu Lautém, Superintendente António Rego Fernandes. Imajen Tatoli/Eugénio Pereira

Komandante PNTL Munisípiu Lautém, Superintendente António Rego Fernandes, ba jornalista iha Postu Polísia Lautém, ohin, informa, asidente tráfegu ne’ebé akontese iha Suku Lore II, Postu Administrativu Lospalos, Munisipiu Lautém,  domingu (11/10),  rezulta ema na’in-tolu mate fatin, na’in-tolu  kanek todan no na’in-ualu  kanek kamaan.

PNTL halo investigasaun ba karreta trek ho Matríkula A. 51887 baku fila, tanba kauza  hosi fatór umanu no problema kondisaun estrada aat halo karreta monu ba rai naruk metru 20-liu.

Asidente tráfegu ne’ebé akontese iha Suku Lore II, Postu Administrativu Lospalos, Munisipiu Lautém, domingu (11/10), rezulta ema na’in-tolu mate fatin, na’in-tolu kanek todan no na’in-ualu kanek kamaan. Imajen/foti hosi Facebook

Vítima sira ne’ebé mate no kanek nu’udar família ida-ne’ebé sai  hamutuk iha uma hodi sa’e karreta ba pasa féria hodi selebra sira-nia oan ida ninia aniversáriu iha Tutuala filafali iha tuku 20:00 Otl, maka enfrenta asidente.

Vítima sira ne’ebé kanek,  António Rego Fernandes informa, PNTL ho komunidade evakua kedas ba ospitál Lautém hodi hala’o tratamentu intensivu no vítima sira ne’ebé mate entrega ona ba família hodi hala’o funerál iha sira-nia moris fatin.

PNTL mós detein kedas suspeitu motorista ne’ebé lori karreta hodi halo investigasaun no aprezenta ona ba Ministériu Públiku.

Superintendente António simu pose hosi Komandante Jerál PNTL, Komisáriu Faustino da Costa, iha loron 01 jullu 2020, hodi assume knaar nu’udar Komandante PNTL Lautém.

Jornalista: Eugénio Pereira

Editór: Francisco Simões

iklan
iklan

Leave a Reply

iklan
error: Content is protected !!