Magnífiku Reitór Universidade da Paz (UNPAZ), Adolmando Amaral. Imajen Tatoli/Eugénio Pereira

DILI, 16 outubru 2020 (TATOLI)–Alumni Uversidade da Paz (UNPAZ), sesta ne’e hato’o asaun protestu hasoru Reitór UNPAZ, Adolmando Amaral atu rezigna an husi ninia kargu ne’e tanba la konkorda ho desizaun balun ne’ebé nia foti hamosu injustisa sosiál.

Portavóz Alumni UNPAZ, Maju Maubere, hateten diskorda ho deklarasaun Reitor nian ne’ebé kondena saudozu Lucas da Costa “Rama Metan” katak uza osan $6.000 hodi halo imajiolojia ka pencitraan ba hamorin naran universidade nian para hetan rekoñesimentu internasionál mezmu la liuhosi kompetisaun ruma.

Alumni sira mós insatisfeitu ho desizaun Reitór UNPAZ nian tanba  halo mudansa ba modelu diploma iha 2019 liubá hamosu injustisa sosiál.

Aleinde ne’e, desizaun unilaterál hodi taka Departamentu Empreendedorizmu Fakuldade Ekonomia.

“La aseita ho deklarasaun Reitór Adolmando nian katak dosente sira iha UNPAZ laiha kualidade liuliu dosente iha Fakuldade Direitu, ida-ne’e konsidera hanesan  dezakreditadu hasoru korpu dosente sira hotu liuliu ba dosente sira iha Fakuldade Direitu,” Portavóz Alumni UNPAZ, Maju Maubere, informa ba jornalista sira, hafoin hato’o asaun protestu  ho tema asaun salva UNPAZ, hasoru Reitór UNPAZ, iha ninia servisu fatin.

Alumni sira mós la konkorda no desizaun Reitór UNPAZ nian hodi suspende saláriu ba dosente na’in haat no funsionáriu administrasaun na’in haat.

Entreantu, durante hato’o asaun protesta ne’e Alumni UNPAZ sira husu ba Reitór Adolmando Amaral, atu re-imprime diploma 2019 tenke hanesan ho dezeñu diploma sira antes ne’e nian.

Hatán ba ezijénsia ne’e, Magnífiku Reitór UNPAZ, Adolmando Amaral, hateten prontu atu rezigna an.

“Ha’u bele tuun maibé tenke aprezenta evidénsia, tanba ha’u mai ne’e mós liuhusi prosesu demokrátiku ida. Se ema hotu ne’ebé mak momentu ne’e fó fiar ba ha’u mak hakarak ha’u tuun, prontu ha’u simu. Agora, ha’u mós alumni ida hanesan maluk alumni sira no alumni barak liu mak fó hela fiar ba ha’u. Laiha dalan ha’u atu la’o tuir sira-nia hakarak” nia hateten.

Parte rua konkorda ona sei realiza  enkontru hodi koa’lia asuntu ne’e iha loron 24 fulan outubru iha Dili.

“Karik sira hakarak kontinua asaun ne’e, bá-oin universidade iha ona desizaun hodi husu ba Polísia Nasionál Timor-Leste atu atua ho dalan ne’ebé justu no dignu hodi labele prejudika fali prosesu ensinu aprendizajen ba estudante-sira ne’ebé sei ativu hela tanba asaun ne’ebé mak maluk alumni sira halo ne’e tama tiha ona koridór kampus nian,” nia hateten.

Jornalista : Tomé Amado

 Editór: Agapito dos Santos

4 KOMENTÁRIU

  1. Iha mudansa ba universidade nian,, maibe tenki lao tuir irarkia universidade da paz antes nee implenta ona laos uja deit ita nia analojia nebe mak la kinstrutivo…..nebe persija ema hotu nia hanoin mak bele sai hanoin nebe mak konstrutivo.
    Abc

  2. Nu’udar sidadaun baibain ida, ha’u konkorda ho saida maka reitoal atual halo ne’e loos. Ema hanesan nia ne’e la barak, barani halo kritika, maibe konstrutiva, ba lala’ok instituisaun ne’e nian iha tempu liuba no koko halo mudansa bainhira asume lideransa. Tuir ha’u-nia haree, iha lideransa Dr. Lucas nian, UNPAZ aposta liu ba oinsa absorve estudante barak sein haree ba kualidade. Tanba ne’e, hein katak ho Sr. Adolmando nu’udar Reitor foun, bele halo mudansa hodi aposta liu ba kualidade atu nune’e universidade ne’e bele sobrevive, selae aban bainrua hela de’it naran.

HAKEREK NO HATÁN

Please enter your comment!
Please enter your name here