Hakerek nain, Rosário S, Araújo.

Hosi:

Rosário Salsinha Araújo

Estadu Timor-Leste hamriik metin tinan 20 liu ona, deklara  nu’udar Nasaun soberanu iha mundu, hamriik hanesan Nasaun ida, povu ida no Estadu ida. Signifika ita hamriik hanesan no tuur hanesan husi rezultadu luta naruk ba mehi ida, mehi ne’e hahú husi asua’in sira, funu na’in no pioneiru mak sakrifika sira án tomak hodi sai eroi no patriota ba libertasaun, ohin ema hotu bele goza ukun rasik án, maibé sintidu luta ne’e ukun na’in sira ladauk hatuur loloos tuir planu dezenvolvimentu nasionál ne’ebé hakerek tuir mehi Nasaun nian atu liberta Timor-Leste husi frajilidade ekonomia, hatún kiak no dezempregu, dezenvolve rekursu umanu, fortifika infraestrutura, hasae kapasidade lideransa sira iha munisípiu no seluk tan.

Lideransa Nasaun sira dahuluk hakerek hela planu estratéjia dezenvolvimentu nasionál 2011-2030, lei lubun ba lubun ko’alia kona-ba polítika desentralizasaun podér no dezempeñamentu karreira profisionál no méritu iha fatin importante sira iha Nasaun atu muda Estadu nia empeñamentu iha progresu oi-oin, maibé polítika ida ne’e ladauk atinje, tanba hakerek de’it teoria iha surat tahan leten, ladauk tau polítika rekrutamentu iha prátika, promosaun karreira profisionál ne’ebé adekuadu tuir méritu bazeia ba background akademia ne’ebé loloos, karik tinan 20 liu ita la sente, maibé pensamentu makaer ukun sira tenke hahú hanoin Nasaun ne’e atu ba ne’ebé iha tinan hirak tuir mai.

Nasaun ne’e atu adere ba ASEAN no tenke kumprimenta ba kritériu sira atu ba hamutuk ho Nasaun sira ne’e, oinsá mak kestaun ki’ik sira mak liga ba asuntu rekrutamentu sira atu ba sai lider iha munisípiu, polítiku sira sei kahur nafatin interese, hili kandidatu sé de’it la’ós atu ba halo kontente án, maibé atu serbí Estadu no povu, tanba ne’e polítika rekrutamentu sira tenke hahú fihir ema nia kapasidade, edukasaun, esperiénsia, lideransa, komportamentu sívika, moral, integridade, vizaun ba progresu dezenvolvimentu iha munisipál no seluk tan, tenke prienxe kritéria hirak ne’e atu ema hotu bele kompete ho transparénsia mak hafoin pasa, la’ós tanba favoritizmu, nepotizmu hodi buka oportunidade, polítiku sira bainhira jere sala interese Nasaun ne’e risku no marjen ba Estadu, tanba iha poténsia the wrong man in the right place.

Urjénsia implementasaun konsetu the right man on the right place ou tau ema loos iha fatin ne’ebé loos nu’udar objetivu Estadu  hodi atinje boa governasaun iha mákina Estadu nian, tanba ne’e polítika Estadu nian ezije nafatin governante no polítiku sira atu prioritiza sistema rekrutamentu sira tenke haktuir ba lei hodi tau ema ne’ebé profisionál tantu iha kargu ezekutivu sira no pozisaun polítiku sira, husi ne’e mak sei lori mudansa boot ba mákina no progressu dezenvolvimentu Estadu nian ba povu ho justu atu koresponde duni nesesidade komun sira mak povu tomak enfrenta hela iha rai ida ne’e.

Destakamentu ka rekrutamentu sira kona-ba estrutura munisipál tenke sukat ema nia kapasidade, liu-liu nivel edukasaun formál tenke tau konsiderasaun maka’as atu fó valorizasaun ba esforsu tomak Estadu nian durante fó bolsa estudu ba maestradu sira iha rai liur no rai laran, nune’e mos dignifika ensinu superiór rai laran sira nia kapasidade tomak ne’ebé  investe hodi forma kualidade rekursu umanu iha Nasaun ida ne’e, ida ne’e la’ós kestaun atu diskute, tanba evolusaun moderna ne’ebé iha ezije kualidade rekursu umanu ne’ebé mais profisionál hodi apoiu setór públiku nia servisu, liuliu hatene oinsá jere no define lei sira, hatene halo jestaun atu administra, hatene halo planu dezenvolvimentu no hatene halo jestaun ba polítika orsamentu, buka dalan oinsá atu dada investimentu iha munisípiu sira.

Haforsa setór privadu sira, mobiliza organizasaun sira iha sosiedade hodi promove dezenvolvimentu turizmu no kultura sira, brani foti dezisaun sira, hatene kebra situasaun difísil sira, matenek rezolve problema sosiedade oi-oin, la’ós lider ida ke problemátiku no autoritáriu, hatene adapta án ba mundu teknolojia, la’ós lider ho modelu hanesan, deskulpa, RT ka RW tempu okupasaun nian, lider ida tenke visionáriu no ativu buka solusaun ba sosiedade tomak, la’ós ba partidu nia interese ou koor sira nia hakarak, tanba ne’e rekrutamentu sira evita labele intervein husi komponente ne’ebé de’it , panelista sira tenke independente duni hodi jere sira nia papel, se-lae konflitu interese no abuzu poder mak sei mosu, tanba impoin hanoin polítiku nian ba prosesu rekrutamentu sira.

Timor-Leste tenke muda nia komportamentu no kultura polítika hodi lori rai ida ne’e sai sivilizadu, Nasaun ida atu sai di’ak depende kultura polítika ne’ebé di’ak, ida ne’e signifika tratamentu ba asuntu públiku sira labele partidariza nu’udar patrimóniu própriu organizasaun polítiku A ka B nian, se-lae dezisaun hotu nakonu ho intensaun konflitu interese, nune’e bainhira ukun sei implika ba abuzu poder públiku, tanba tenke obedese ba interese partidu nian duke interese povu nian, tempu ona atu tau asuntu profisionál no polítika sira tau tuir nia fatin, polítika jestaun rekrutamentu sira tenke loke ba públiku atu kompete, evita marjen sira hodi viola lei.

Jestaun ne’ebé di’ak mak sei minimiza risku no irregularidade sira labele mosu hodi kumpre tuir lei nia hakarak, Samalarua, Eis Komisáriu Adjuntu Prevensaun, CAC, asuntu disiplinár liga ba sistema rekrutamentu sira tenke sensibiliza nafatin atu labele kontradis ho prinsípiu jerál, artigu 73, Estatutu Funsaun Públika nian ne’ebé ko’alia mos kona-ba infrasaun ho nia pena sira, iha artigu 75 estatutu funsaun públika, sansaun ka pena sira nia efetu temi iha artigu 81, mezmu nune’e ladauk haree vontade polítika ne’ebé di’ak hodi implementa no rigór ba lei ne’e, laiha mos instituisaun ka polítiku balun ke fó koresaun ba sala sira iha sistema rekrutamentu nian, ida-idak hakarak defende nia pensamentu rasik nune’e laiha ema ida mak sala no viola, ema hotu loos tuir pensamentu rasik, ida ne’e mak akontese nafatin sei sai frajilidade boot ba asuntu boa governasaun iha Timor-Leste ba futuru, tanba kestaun hirak ne’e iha ona lei, maibé marjen ba violasaun mosu daudaun iha prátika funsionalismu públika nia servisu.

Timor-Leste tenke ba oin, ida ne’e mak mehi Estadu nian, mehi sira ne’e ukun na’in no servidór sira mak tenke hatene jere hodi realiza tuir planu dezenvolvimentu nasionál Estadu nian ba Nasaun ida ne’e, se-lae Nasaun tau planu, maibé realistiku laiha tanba tendensia polítiku mak númeru um, planu hirak ne’e iha atu fó resposta ba problema nasionál Nasaun nian.

Opiniaun pesoál; hakerek na’in servisu iha CAC

Karik iha hanoin ruma bele kontaktu:

Hp:+ 670  7732 6592

Email: rosariosalsinha@gmail.com

HAKEREK NO HATÁN

Please enter your comment!
Please enter your name here