Komandu Polísia Munisípiu Dili realiza enkontru jerál ho membru Konsellu Seguransa Munisipál (KSM), Konsellu Polisiamentu Komunitáriu (KPK) iha salaun enkontru Polísia Akademia Comoro. Imajen Tatoli/Eugénio Pereira

DILI, 15 outubru 2020 (TATOLI)- Komandu Polísia Munisípiu Dili, ohin, realiza enkontru jerál ho membru Konsellu Seguransa Munisipál (KSM), Konsellu Polisiamentu Komunitáriu (KPK) hodi buka solusaun hamutuk redús kazu krime no problema violénsia iha kapitál Dili.

Notísia Relevante : PNTL halibur diretór eskola 29 hodi introdús “Polisia Ba Eskola”

Komandante Polísia Munisípiu Dili, Superintendente Xefe, Henrique da Costa, konsidera servisu KSM no KPK nia knaar importante tebes hodi ajuda PNTL Dili realiza ninia mehi lori Dili sai fatin seguru no paz ba sosiedade.

“Enkontru ida ne’e ita foka liu ba buka solusaun ba kazu konflitu ne’ebé sempre akontese iha Dili, hanesan tuda malu, grupu juventude sira ataka malu, violasaun doméstika aas, tanba ne’e mak ita husu para servisu hamutuk ho ita nian lider komunitária sira para identifika abut ka hun hosi problema sira ne’e depois ita buka solusaun,” Komandante Henrique hateten ba jornalista sira iha salaun Auditória Sentru Formasaun Polísia (CFP), Comoro, Dili.

Nia dehan, PNTL sei koopera nafatin ho Autoridade Munisípiu Dili no autoridade suku sira, Organizasaun Naun Governmental (ONG), Grupu Juventude sira no sosiedade, atu hamutuk lori sidade Dili sai fatin paz no hakmatek ba abitante hotu.

Komandu Polísia Dili rasik durante ne’e implementa ona programa “Polísia Vizita Kampus” no “Polisia Vizita Eskola” ho intensaun hodi introdús programa komandu nian kona-ba polísia nia knaar atu garante moris hakmatek.

PNTL rasik halo analiza dala barak kazu konflitu sira sempre akontese iha kapitál Dili envolve joven barak, tanba hemu-tua to’o lanu no problema joven barak seidauk hetan servisu permanente.

“Dala ruma hosi bairru ida ba hamutuk fila fali ho joven sira iha bairru ne’ebá, depois ataka malu iha bairru ne’ebá, tanba ne’e, ita nian programa ida polísia vizita ba uma ne’e ita sei hala’o hamutuk ho OPS sira no KPK, no lider komunitáriu bele susesu iha programa ne’e,” nia hateten.

Iha fatin hanesan, Administradór Postu Administrativu Don Aleixo, Thomas Barros hateten, prezensa KPK nian importante tebes hodi ajuda servisu PNTL nian.

Nia dehan, durante Estadu Emerjénsia (EE) hodi luta hasoru propagasaun surtu COVID-19, membru KPK sira ladún ativu hala’o atividade, maibé membru KPK sempre koopera rezolve problema iha bairru sira.

Administradór Postu Administrativu Don Aleixo, Thomas Barros. Imajen Tatoli/Eugénio Pereira

Administradór Postu Administrativu Don Aleixo ne’e afirma, KPK koopera nafatin ho OPS hodi halo vizita ba bairru sira ne’ebé risku ba konflitu hodi sosializa programa paz hodi konsola juventude kontribui ba estabilidade.

“Ita identifika grupu arte marsiál sira ne’ebé sempre halo provokasaun no halo sosiedade sira la hakmatek, entaun ita bele foti hosi parte grupu arte marsiál sira ne’e, sé mak sai hanesan autór, ita foti sira, ita fó formasaun ba sira, nune’e bele servisu ho ita buka hakotu problema sira,” nia hatutan.

Tuir nia haree, atu redús kazu krime sira ne’e, save importante mak, xefe suku, xefe aldeia, lia-nain sira, no koordenadór juventude bairru sira presiza koopera hamutuk para bele redús konflitu.

Juventude tenke kari dame no kuda domin

Administradór Postu Don Aleixo, Thomas Barros mós apela ba juventude iha suku to’o aldeia sira, presiza kari dame, kuda domin no halo esforsu kapasita sira-nia aan hodi hetan servisu fó kontribuisaun ba sir- nia futuru no família.

Thomas tatoli tan, juventude nia kontribuisaun importante tebes no joven maka sai nu’udar ai-riin ba nasaun atu kria dame no lori nasaun sai hosi konflitu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here