DILI, 15 outubru 2020 (TATOLI) –Motorista ida iha órgaun governu nian, ohin, tenke hatán iha Tribunal Distritál Dili (TDD) ho estatutu arguidu tanba kondús karreta Estadu nian hodi ba tula fali ai-maran ba interese privadu.
Liuhosi audiénsia julgamentu ne’e, Ministériu Públiku aprezenta faktu balun katak, arguidu hanesan funsionáriu públiku iha ministériu ida, iha loron sábadu (25/05/2019), kondús karreta Estadu nian ba tula ai-maran no ekipa konjunta kompostu hosi Komisaun Anti-Korrupsaun (CAC), Diresaun Nasional Patrimóniu Estadu (DNPE) ho Polísia Nasionál Timor-Leste (PNTL) Unidade Tránzitu, halo apreensaun iha Kulu-hun, Dili.
Ekipa operasaun kaer arguidu ho inisiál ECP iha tuku 10:00 dadeer, ho karreta Estadu ho tipu Hilux, númeru matrikula 03-163 G, tula hela ai-maran iha diresaun Kulu-hun nian atu ba Maskarinhas.
Bazeia ba orden servisu diresaun hosi ministériu ne’ebé arguidu servisu ba katak dirijente sira entrega karreta refere ba nia hodi hala’o viajen servisu durante loron rua (2), hahú hosi loron 14 to’o 20 maiu 2019.
Arguidu hanesan funsionáriu públiku, uza sasán Estadu ne’ebé maka lei la fó dalan ba nia atu para iha nia uma no uza ba nia atividade privada iha loron ferias nia laran, maibé kontinua hala’o ho intensaun hodi hetan vantajen ilejítimu no kauza prezuiju ba Estadu.
Arguidu hatene katak nia hahalok ne’e kontra lei, mézmu hanesan ne’e, nia kontinua hala’o hahalok ilísitu refere hodi benefisia nia an no nia família.
Ho nune’e, MP promove arguidu nu’udar autór ba prátika krime pekulatu uzu ne’ebé previstu no punidu iha artigu 296 kódigu penál Timor-Leste.
Hatán ba akuzasaun hirak ne’e, arguidu ECP konfesa ho integralmente ba Tribunál katak faktu sira ne’e loos hotu kedas.
Iha alegasaun Ministériu Públiku liuhosi Prokudora Lidia Soares, husu ba tribunál atu aplika pena prizaun fulan-neen (6) no suspende ba tinan-ida.
Defensor Públiku, Afonso de Soares, ne’ebé fó asisténsia ba arguidu husu Tribunál atu aplika pena administrasaun tanba arguidu konfesa loloos nia sala no promete la halo tan.
Juis singular, Julmira Auxiladora, deside adia fila-fali julgamentu ne’e ba iha loron 29 outubru, tinan ne’e, tuku 17:30 OTL, hodi rona desizaun finál.
Jornalista : Nelson de Sousa
Editór : Francisco Simões
