Vise-Prezidente CCI-TL asuntu infraestrutura, João Fernandes Alves. Imajen Tatoli/Joanico de Araújo

DILI, 15 outubru 2020 (TATOLI)--Membru Câmara Comércio Indústria, Timor-Leste (CCI-TL) hosi munisípiu Ermera, Bobonaro no Viqueque partisipa formasaun kona-ba eliminasaun violénsia hasoru feto no labarik.

Formasaun ne’e realiza hosi CCI-TL nasionál ne’ebé serbisu hamutuk ho organizasaun mundiál ba traballu (ILO, sigla portugés) liuhosi workshop durante loron-rua.

Vise-Prezidente CCI-TL asuntu infraestrutura, João Alves, hateten atividade ne’e hanesan kontinuasaun programa spotlight initiative atu eduka liuhosi treinamentu ba inan-feto ne’ebé hetan violasaun oin-oin, hanesan aman husik nia kaben halo sira tenke sustenta oan no dalaruma sustenta an rasik.

“Objetivu treinamentu ne’e atu fahe informasaun no hasa’e koñesimentu partisipante kona-ba violénsia bazeia ba jéneru, doméstika no violasaun parseria íntimu hodi kontribui ba eliminasaun violénsia hasoru feto no labarik iha Timor-Leste,” João Alves tenik iha salaun CCI-TL, Akait, kinta ne’e.

Nia konsidera treimamentu ne’e importante tanba ajuda partisipante sira bele hatene saida mak violénsia no sira sei fila ba munisípiu hodi aplika.

“Hosi ne’e bele hahú daudaun fó indepedénsia totál inan-feto sira atu labele depedente ba ema seluk. Liuhosi treinamentu ne’e, hanorin sira halo negósiu no bele asesu iha kréditu banku nian hodi halo sira-nia produtu rasik. Tanba ne’e, ita sei fó kreditu 3% ba inan-feto sira ne’ebé hakarak halo negósiu,” nia subliña.

Iha fatin hanesan, Reprezentante ILO iha Timor-Leste, Margaret Araújo, dehan entidade rua  realiza workshop ne’e tanba ILO hola parte luta ba eliminasaun violénsia no asédiu iha fatin serbisu ne’ebé haree liu ba área empregu nian.

“Empregu mós sai hanesan fatór ne’ebé dalaruma bele sai forma violénsia. Tanba ne’e, liuhosi formasaun ne’e bele mós hamosu hanoin ne’ebé di’ak tebes no kria ambiente saudável iha serbisu fatin,” nia akresenta.

CCI-TL ho ILO realiza atividade ne’e ho apoiu finanseiru hosi Uniaun Europeia ho montante $23.000.

Jornalista: Cipriano Colo

Editora: Julia Chatarina

HAKEREK NO HATÁN

Please enter your comment!
Please enter your name here