Foto hamutuk ho Komandante Jerál PNTL, Komísariu Faustino da Costa. Imajen Tatoli/ Dok.

DILI, 15 outubru 2020 (TATOLI)- Hahú hosi loron 12 to’o loron 13 outubru 2020, Komandante Jerál Polísia Nasionál Timor-Leste (PNTL), Komisáriu Faustino da Costa, halo vizita ba observa  servisu  Komandu Polísia Munisípiu Viqueque, Manufahi no Aileu.

Notísia Relevante : OJE 2020, PNTL Sei Selu Dívida Millaun $2.7

Komisáriu Faustino hateten, vizita ne’e importante hodi ba haree no rona diretamente kondisaun no problema ne’ebé maka komandu tolu enfrenta atu bele buka solusaun.

“Vizita ne’e halo hodi mai haree no rona difikuldade ne’ebé maka komandu hasoru. mai fó mós Komandu PNTL nia hanoin atu ajusta tuir saida maka ita nia governu nia hakarak ba oin,”  hateten Komisáriu Faustino da Costa, liuhosi nota komunikadu imprensa ne’ebé Agência Tatoli asesu, ohin, hosi Komandu Jerál PNTL.

Iha programa vizita ne’ebé hahú hosi Komandu PNTL Viqueque, Komisáriu Faustino ho ekipa rona uluk aprezentasaun servisu hosi Komandante PNTL Munisípiu Viqueque, Superintendente Sebastião Alves Quintão, ne’ebé aprezenta relatóriu kona-ba koíma ne’ebé Komandu Viqueque rekolla hosi infratór sira hodi hatama ba kofre Estadu, hahú hosi janeiru to’o outubru, tinan ne’e, hamutuk $2,181,00.

PNTL Viqueque liuhosi Servisu Investigasaun Kriminál (SIK) durante fulan janeiru-outubru, rejista mós kazu 141 ne’ebé enkamiña ona ba Ministériu Públiku (MP) hamutuk 124, kazu ualu (8) maka taka no kazu sia (9) sei iha prosesu nia laran.

Hafoin hala’o enkontru iha Komandu PNTL Viqueuque, Komandante Fautino ho ho komitiva hala’o fali vizita ba iha Eskuadra Fatuberliu, Munisípiu Manufahi hodi haree difikuldade ne’ebé membru sira enfrenta durante hala’o kna’ar hanesan autoridade seguransa.

Iha loron 13 outubru, Komisáriu Faustino kontinua hala’o fila fali enkontru ho Komandante PNTL Munisípiu Manufahi hamutuk ho Komandante Eskuadra haat hanesan Same, Turiskai, Alas no Faturbeliu, inklui Xefe Seksaun no Servisu sira komandu munisípiu nian.

Komandante PNTL Munisípiu Manufahi, Superintendente Joni Viana, aprezenta situasaun seguransa iha munisípiu ne’e, servisu no problema ne’ebé maka sira enfrenta durante ne’e.

Iha Manufahi, Komisáriu Polísia ne’e hala’o vizita mós ba iha Kazerna Komandu nian hodi haree besik liután kondisaun edifísiu no membru hirak ne’ebé hela iha kazerna refere.

Iha loron ikus vizita nian, Komandante Jerál PNTL ho ekipa to’o iha Komandu PNTL Aileu hodi hala’o enkontru ho Segundu Komandante PNTL Munisípiu Aileu Superintendente Asistente António Lourenço da Costa Soares hamutuk ho Komandante eskuadra sira hanesan Aileu Villa, Lekidoe, Laulara no Remixio.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here