DILI, 15 outubru 2020 (TATOLI)—Proposta-lei Orsamentu Jerál Estadu ne’ebé ohin Governu submete ba Parlamentu Nasionál foti biliaun $1.377,6 hosi fundu petrolíferu hodi finánsia OJE 2021.
Notísia Relevante: Governu submete ona Proposta Lei OJE 2021 ba PN
Proposta OJE 2021 hamutuk biliaun $1.895 ne’e kompostu hosi saláriu no vensimentu millaun $239,26, bens (sasán) no servisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.
Hosi proposta orsamentu 2021 ho montante biliaun $1.895 ne’e foti biliaun $1.377 hosi fundu petrolíferu.
“Levantamentu hosi Rendimentu Sustentável Estimadu (RSE) hosi fundu petróleu millaun $547,9 levantamentu acima (foti liu) RSE millaun $829,7. Totál biliaun $1. 377 ne’e Governu atu halo levantamentu (foti) hosi fundu petrolíferu,” dehan Ministra Finansa Ein-Ezersísiu atuál Vise-Ministra Finansa, Sara Lobo Brites, liuhosi Konferénsiaa Imprensa hafoin submete proposta OJE 2021 ba Prezidente Parlamentu Nasionál, Aniceto Longuinhos Guterres Lopes, iha Parlamentu Nasionál, kinta ne’e.
Vise-Ministra Finansa fó-sai katak, reseita naun-petrolífera ne’ebé finansia OJE 2021 hamutuk millaun $508,5 no valór ne’e inklui millaun $238,8 korresponde ho saldo jerénsia no millaun $70.7 empréstimu.
Nune’e mós, nia dehan, saldo tezouru ne’ebé mak utiliza ba iha finansiamentu orsamentu 2021 hamutuk millaun $150 no millaun $88.8 hanesan rezerva.
Sara Lobo dehan, hosi Governu sentrál adisiona ka transfere tán millaun $29 ba RAEOA no totál ba RAEOA-ZEESM hamutuk millaun $127.
Entretantu nia hateten reseita tributária millaun $173,2, impostu direitu no indireitu kuaze millaun $8,1, reseita própria millaun $9,1.
“Prevee ba Fundu Infraestrutura por volta millaun $277. Prioridade esensiál sira mak hanesan kontinuasaun obra sira-ne’ebé la’o hela hanesan estrada, aeroportu no mós kontinuasun obra ezistente sira-ne’ebé iha. Governu tuir nafatin orientasaun. Ita kontinua investe nafatin iha setór sosiál, saúde no depois setór ekonómiku,” nia dehan.
Ministra Finansa Ein-Ezersísiu ne’e fó-sai katak, millaun $277 ne’e foti hosi kapitál dezenvolvimentu millaun $503,20.
Jornalista: Evaristo Soares Martins
Editór: Cancio Ximenes
