GMPTL komemora loron mundiál ba feto rurál hamutuk ho inan-feton iha suku Dato, kinta (15/10). Imajen/Mídia SEKoop

LIQUIÇÁ, 15 outubru 2020 (TATOLI)–Prezidente Grupo das Mulheres Parlamentares de Timor-Leste (GMPTL), Lídia Norberta, komprometidu nu’udár órgaun lejizladór sei kontinua asegura direitu feto rurál, nune’e bele iha oportunidade hanesan ho mane atu kontribui iha prosesu dezenvolvimentu nasionál.

“Ami hanesan lejizladór labele finansia feto maluk sira, maibé bele buka meiu asegura Governu hodi bele hala’o knaar ho di’ak no asegura katak oportunidade ba feto no mane iha rai ukun-an ne’e tenke hanesan,” Deputada Bankada FRETILIN ne’e dehan iha  ámbitu komemorasaun loron mudiál ba feto rurál iha suku Dato, kinta ne’e.

Grupu parlamentár ne’e komemora loron mundiál hamutuk ho inan-feton iha Suku Dato no Loidahar, postu administrativu Liquiçá, munisípiu Liquiçá, ho tema nasionál ‘investe iha ekonomia rurál sei hamosu rezisténsia no bele aselera dezenvolvimentu inkluzivu’ no ba GMPTL rasik ho tema ‘haforsa produsaun iha agrikultura, ai-han seguru, nutrisaun no harii reziliénsia ba COVID-19’.

Grupu feto parlamentár hakarak konvoka reuniaun ho Sekretaria Estadu Igualdade Inkluzaun (SEII) hodi ko’alia kona-ba oinsá atu tau atensaun ba maluk feto sira.

“Iha orsamentu 2021 ne’e bainhira Governu mai aprezenta, sei iha enkontru ida ho SEII  hodi  iha entendimentu asegura asesu ba feto maluk sira, ne’ebé la’ós de’it iha área rurál,” nia akresenta.

Deputada ne’e nota katak, liuhosi atividade kooperativa, feto maluk sira bele organiza-an di’ak no hadi’a ekonomia família.

“Entaun ita tenke buka defende maluk feto ninia partisipasaun iha vida ekonómika tanba bainhira feto rurál susesu maka emprezáriu sira mós sei susesu,” Deputada Bankada Governu ne’e subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here