DILI, 15 outubru 2020 (TATOLI)—Arguidu ho inisiál JS, ohin, konfesa ho parsiál ba Tribunal Distritál Dili (TDD) katak, nia la envolve iha konfrontu tuda-malu entre grupu juventude rua iha area Aituri-laran, Tabessi, Dili, no nia la hatene sé mak tuda polísia ho polísia nia karreta.
Tuir kronolojia ne’ebé aprezenta hosi Ministériu Públiku katak iha loron 20 setembru 2016, lezadu LM nu’udar membru polísia hala’o nia kna’ar hanesan polísia iha eskuadra Nain Feto.
Iha momentu ne’ebá, lezadu LM simu kontaktu katak iha grupu rua maka halo problema iha ne’ebá, ho nune’e, lezadu ho nia ekipa to’o ba iha fatin ne’ebá. Teki-teki de’it, arguidu lori fatuk tuda hasoru lezadu nia liman, no lori mós fatuk tuda karreta patroli polísia nian.
Konsekuénsia hosi aktu arguidu nian halo lezadu sente moras no karreta polísia nian aat. Nune’e, MP akuza arguidu krime obstrusaun autoridade públiku ne’ebé previstu iha artigu 243 no danu agravadu artigu 259 kódigu penál Timor-Leste.
Liuhosi audiénsia julgamentu ne’e, arguidu konfirma katak, faktu ne’ebé arrola hosi MP laloos hotu, tanba momentu ne’ebá ekipa polísia ba atua kazu ema tuda malu iha area refere no fatuk sira tuda hosi leten no nia parte la envolve iha akontesimentu ne’e.
Lezadu LM, dehan, momentu ne’ebá nia la haree ho matan sé maka tuda kona nia parte tanba nakukun.
Iha alegasaun Ministériu Públiku husu Tribunál aplika pena adekuadu ba arguidu no parte Defeza husu absolve. Maibé tribunál deside adia fila-fali ba iha loron 29 fulan ne’e, iha tuku 17:00 Otl, hodi rona leitura.
Jornalista : Nelson de Sousa
Editór : Francisco Simões
