Ekipa WFP iha Timor-Leste hamutuk ho ekipa Malaysia Airlines akompaña hatun sasán iha Aeroportu Internasionál Prezidente Nicolau Lobato. Imajen/ONU Timor-Leste

DILI, 14 outubru 2020 (TATOLI)—Voo umanitáriu ho Malaysia Airlines ne’ebé alugadu hosi Programa Ai-han Mundiál (WFP, sigla inglés) iha kuarta ne’e tula pasajeiru hamutuk na’in-50 hosi Kuala Lumpur, Malázia bá Dili.

Aviaun ne’e to’o iha Aeroportu Internasionál Prezidente Nicolau Lobato, Comoro, Dili iha tuku 15:00.

Reprezentante WFP iha Timor-Leste, Dangeng Liu, informa aviaun ne’e tula pasajeiru no apoiu umanitáiru mai Timor-Leste.

“Aviaun ne’e lori pasajeiru na’in-50 mai Dili no tula fila ema na’in-17 bá Kuala Lumpur,” Dangeng Liu dehan liuhosi nota ne’ebé Agência Tatoli asesu iha kuarta ne’e.

Aleinde ne’e, aviaun alugadu ne’e tula mós sasán médiku sira ho todan kilograma 815.

WFP halo charter ba Malaysia Airlines hodi oferese asisténsia umanitária via transporte aéreu.

Voo dahuluk iha 14 juñu lori ekipamentu médiku ba prevensaun COVID-19 nian hamutuk kaixa 134 no traballadór  asisténsia umantária, enkuantu iha voo daruak ne’ebé akontese iha 21 juñu lori ekipamentu COVID-19 nian hamutuk kaixa haat, ne’ebé fó ba World Vision no voo datoluk tula traballadór WFP na’in-12 hodi fó asisténsia umanitária.

Bainhira WFP hahú halo intervensaun iha 1 maiu konsege transporta ona pasajeiru hamutuk 3.000 resin, ne’ebé semo ona bá destinasaun hamutuk 40. 

Relasiona ho transporte kargo, organizasaun mundiál ne’e tula ona sasán umanitáriu no saúde hamutuk metru kúbiku 17.000 ba nasaun 130 lori organizasaun na’in-33 nia naran.

Hahú hosi janeiru, WFP, Organizasaun Mundiál ba Saúde (OMS) no komunidade internasionál hahú haruka ona sasán umanitáriu inklui médiku ba nasaun 121 husi sentru lojístiku globál no rejionál, inklui Kuala Lumpur no Guangzhou, Xina, ne’ebé lokaliza iha Ázia.

Iha Ázia no Pasífiku, voo ne’ebé aluga husi WFP fó ona apoiu ba intervensaun hasoru COVID-19 iha Afghanistaun, Bangladesh, Laos, Myanmar, no Nepál, maibé iha fatin balun servisu umanitáriu ne’e hetan suspensaun ona desde marsu tanba pandemia.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here