Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/10). Imajen Tatoli/Egas Cristovão

DILI, 14 outubru 2020 (TATOLI)Iha reuniaun Konsellu Ministru (KM) iha kuarta ne’e, Ministru Administrasaun Estatál, Miguel Pereira de Carvalho, aprezenta alterasaun daruak ba Estatutu Orgánika Sekretariadu Tékniku Administrasaun Eleitorál (STAE) nian.

Alterasaun projetu dekretu-lei ne’e hetan aprovasaun iha reuniaun ezekutivu.

“Alterasaun ne’e ho objetivu atu kria estrutura forte no adekuada liu hodi permite instituisaun ne’e bele presta serbisu ho kualidade no profisionál ba sidadaun eleitór sira no partidu polítiku sira hodi organiza prosesu eleitorál sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata sorumutuk KM iha Palásiu Governu.

Governante ne’e esklarese, intervensaun lejislativa ne’e prosede ba eliminasaun figura adjuntu ba Diretór Jerál no ba kriasaun Diresaun Nasionál Administrasaun no Finansa, Aprovizionamentu, Lojístika no Rekursu Umanu.

Nune’e mos, Diresaun Nasionál Koordenasaun Munisipál no Rejiaun Administrativa Espesiál Oé-cusse Ambeno (RAEOA), Edukasaun Eleitorál no Asuntu Jurídiku no Diresaun Nasionál ba Jestaun Baze Dadus ba Resensiamentu Eleitorál, Informasaun ba Públiku no Relasaun Esterna.

Kriasaun STAE bazeia ba dekretu Governu númeru 2/2003 23 jullu, ne’ebé hanesan órgaun tutela ba Ministériu Administrasaun Estatál (MAE) ho responsável ba ezekusaun prosesu eleitorál Estadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here