Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 14 outubru 2020 (TATOLI)- Diretór Ezekutivu FONGTIL, Daniel Santos do Carmo, hateten polítika na’in sira evita labele halo intervensaun polítika ba servisu Comição Anti Corupção (CAC) ho Ministériu Públiku (MP) nian.

Notísia Relevante: CAC haruka ona karta ba MJ atu tradus Lei MPCC ba Tetun

“Polítika na’in sira labele halo intervensaun polítika ba servisu Comição Anti Corupção (CAC) ho Ministériu Públiku (MP) nian. Dala barak akontese ba servisu CAC ho MP nian ne’e sempre iha intervensaun polítika ne’ebé akontese,” dehan Daniel Santos do Carmo ba jornalista sira hafoin partisipa diskusaun meza kabuar entre membru PN ho Sosiedade Sivíl ne’ebé IRI realiza Salaun Crus Vermelha Timor-Leste (CVTL) iha Bairru-Formoza, Gricenfor, Dili, kuarta ne’e.

Nia hateten, haree hosi koordenasaun servisu ne’e ladún iha armonia entaun akontese implikasaun tanba iha influensia hosi polítika sira, tanba realidade iha Timor-Leste ne’e ema gosta hatoman-aan ho politiza informasaun ne’ebé laloos.

Ho ida ne’e, nia hateten, presiza Parlamentu Nasionál (PN), Tribunal Rekursu (TR), Governu no Prezidente Repúblika tenke apoiu instituisaun rua ne’e nia servisu.

Diretór ne’e fó ezemplu, iha kazu balun CAC investiga tiha ona maibé to’o iha Ministériu Públiku, sira dehan loke fali investigasaun seluk tanba de’it akontese ego setoriál, entaun bele dehan intervensaun polítika direta no indireta ona.

Tanba ne’e, nia hateten, Lei Medida Prevenção Combate Corrupção (MPCC) ne’e ema konsidera hanesan baibain entaun lori ema hakarak halo korrupasaun hela de’it.

“Iha Lei Medida Prevenção Combate Corrupção mak ema hakarak halo korrupasaun ne’e no halo hela de’it korrupasaun. Maibé, bainhira kombate korrupsaun ne’e iha ka estabelese ona mak ita buka para halakon. Tanba ne’e, ohin, ita kria diskusau meza redonda hodi halo diskusaun ba lei refere,” nia hateten.

Diskusaun meza redonda ne’e, nia dehan, atu oinsá sensibiliza liuliu sosiedade sivíl atu hatene substánsia hosi lei ne’e rasik tanba lei MPCC ne’e promulga tiha ona maibé ema kontinua preokupa nafatin ho ninia implementasaun ne’e.

“Prezidente Repúblika, Francisco Guterres ‘Lú Olo’, promulga tiha ona lei ne’e maibé ita preokupa mak ba Lei MPCC ne’e ninia implementasaun ne’e,” nia hateten.

Nia haktuir, bainhira lei MPCC la aplika ho di’ak entaun sosiedade sivíl sira hanesan mídia, populasaun no entidade hotu tenke partisipa ativu para ajuda oinsá Lei MPCC nia implementasaun ne’e bele la’o ho di’ak.

“Ita sosiedade sivíl inklui mídia sira, populasaun, entidade hotu-hotu tenke ativa atu ajuda oinsá implementa lei MPCC ne’e ho di’ak iha ita-nia rain,” nia dehan.

Aleinde ida-ne’e, nia haktuir uluk bainhira ema ida riku laiha ema ida mak atu investiga maibé ho lei MPCC ne’e bele fó dalan atu CAC halo ivestigasaun ba ema riku sira kona-ba tanbasá mak halo uma andar no sosa karreta barak.

“Ita laiha direitu atu ba husu ka investiga ema ne’ebé mak moris di’ak hanesan halo uma boot no sosa karreta maibé ho lei MPCC ida-ne’e, fó dalan ba CAC atu bele halo investigasaun,” nia esplika.

Notísia Relevante: Prezidente Repúblika promulga lei MPKK

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here