Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 14 outubru 2020 (TATOLI)- Komandante Polísia Nasional Timor-Leste (PNTL) Munisípiu Dili, Superintendente, Henrique da Costa, informa, PNTL simu ona karta konvite hosi Ministériu Edukasaun Juventude no Desportu (MEJD) atu koloka membru polísia sira halo seguransa ba prosesu imprime matéria ezame nasionál (EN) ba estudante finalista ensinu báziku, ensinu sekundáriu no tékniku vokasionál  nian.

Notísia Relevante : Sylvia sei finaliza prosesu impresaun matéria ezame nasionál iha novembru

Komandante Henrique dehan, Ministériu Edukasaun rasik haruka ona karta konvite ba Komandu PNTL Dili, iha loron 12 outubru, foin lalais ne’e, ho konteúdu husu apoia  PNTL  nian ba asegura seguransa hodi evita ema foti matéria ezame ne’ebé Ministériu Edukasaun konsidera sijilu tebetebes.

MEJD rasik asiona ona kontratu ho Kompañia Silva Dili maka manan konkursu hodi prodús matéria ezame ne’ebé tuir planu sei entrega ba Governu iha novembru, tinan ne’e.

“Ita hetan ona karta hosi Ministériu Edukasaun no ita orienta ona Eskuadra Vera Cruz para halo movimentu no seguransa ba fatin imprime ninian hodi halo seguransa hamutuk ho seguransa Ministériu Edukasaun nian rasik,” hateten Komandante Henrique ba jornalista, ohin, iha Komandu PNTL, Caicoli, Dili.

Nia dehan, PNTL mós sei halo seguransa bainhira estudante sira partisipa ezame hodi evita konflitu no kazu krime sira labele akontese iha área arredores eskola no fatin públiku sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here