Cristo Rei. Imajen/Espesiál

DILI, 14 outubru 2020 (TATOLI)–Maski mundu inklui Timor-Leste enfrenta hela situasaun surtu COVID-19, maibé parte Ministériu Turizmu Komérsiu Indústria (MTKI) kontinua mantein komunikasaun ho reprezentante nasaun viziñu Indonézia atu atualiza nafatin situasaun turizmu, komérsiu no indústria iha Timor-Leste no haree posibilidade atu halo kooperasaun.

Tanba ne’e, Ministru Turizmu, Komérsiu no Indústria, José Lucas do Carmo da Silva, sei hala’o enkontru ho embaixadór Indonézia iha Timor-Leste, Sahat Sitorus, hodi ko’alia kona-ba kooperasaun bilaterál ba promosaun área turíztiku iha rai-rua.

“Semana ida-ne’e sei iha enkontru kortezia ho Embaixadór Indonézia. Ita mantein kontaktu ho ita-nia nasaun viziñu sira atu fó sai nafatin informasaun ba li’ur inklui nasaun Austrália, hanesan mekanizmu ida atu informa no halo promosaun nafatin ba turizmu rejionál katak Timór di’ak hela,” Ministru José Lucas informa iha Palásiu Governu, kuarta ne’e.

Governante ne’e dehan, maski iha situasaun surtu COVID-19 maibé MTKI buka fó sai nafatin informasaun turíztiku no sei  foka liu ba turizmu komunitáriu rai-laran. 

“Ita buka fó sai nafatin informasaun kona-ba turizmu Timor-Leste nian ba li’ur, katak ita iha ne’e di’ak hela, nune’e turista hosi nasaun viziñu preparadu nafatin atu vizita ita-nia rain bainhira surtu COVID-19 laiha ona,” governante ne’e subliña.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here