Memensio Sequeira Freitas.

Hosi: Memensio Sequeira Freitas*)

Manorin mak edukadór profisionál ida-ne’ebé eduka, hanorin, akonsella, treina no avalia ninia estudante sira. Profesór la apenas hanorin de’it iha edukasaun formál maibé mós iha edukasaun naun formál sira no bele sai lalenok, modelu ka ezemplu ba ninia estudante sira. Provérbiu klásiku ida iha lian maláiu dehan “Guru Kencing berdiri, murid kencing berlari”, kontén sentidu ida katak kanorin (estudante) sira sei halo tuir manorin sira-nia hahalok (buat ne’ebé ho valór pozitivu) no se for posível, ho ninia kreatividade rasik bele dezenvolve di’ak liután iha sira-nia moris loro-loron nian. Hosi ida-ne’e de’it, ita bele ona kompriende katak manorin sira iha ninia papel importante tebe-tebes iha prosesu hamosu jerasaun kontinuadór sira-ne’ebé kualifikadu, tantu iha aspetu intelektuál komu iha parte morál.

Artigu simples ida-ne’e mosu atu aprezenta uitoan profisaun ne’ebé manorin sira ezerse no oinsá profisaun ida-ne’e sustenta moris ida dignu ba sira hirak ne’ebé haknaar aan iha papel ida-ne’e. Ohin loron, profesór sira enfrenta situasaun ida kruel tebe-tebes, tanba aleinde ninia bem estar ne’ebé kestionável, enfrenta mós ameasa no dezafiu oin-oin perante sira-nia servisu. Profesór sira la’ós ona grupu respeitadu ida maibé pelu kontráriu sai fali grupu ne’ebé ema seluk hafuhu atu hetan sala ruma hosi sira. Profesór iha fatin balu hetan ameasa, balu hetan baku, balu seluk hetan insultu no laiha ativista ka grupu defensór balu mak defende netik. Maibé bainhira profesór balu halo sala, la’ós ibun uitoan mak tula lia-aat oin-oin hasoru sira. Profesór sira lori buat sira ne’e hotu iha sira-nia kabaas leten, tanba ba sira, sai manorin ne’e profisaun no vokasaun ida mós.

Manorin, la’ós de’it profisaun maibé vokasaun mós

Manorin nu’udar profisaun respeitável ida. Howard M. Vollmer no Donald L. Mills (1996) hateten katak profesór nu’udar profisaun ida-ne’ebé presiza kapasidade intelektuál espesífiku, ne’ebé atinje liuhosi prosesu naruk ida, edukasaun no formasaun sira-ne’ebé ho objetivu domina abilidade ou kompeténsia ka aptidaun atu hanorin no orienta ema seluk.

Definisaun Howard no Donald nian ne’e indika katak sai profesór ne’e presiza duni iha abilidade sufisiente ne’ebé nia hetan liuhosi prosesu estudu no formasaun oin-oin. Ne’e katak, la’ós ema hotu-hotu bele sai profesór ka uza profesór hanesan fatin ida atu hetan de’it empregu maibé sai profesór ne’e ezije kapasidade no aptidaun. Tanba sá? Tanba manorin sira iha atu eduka ema, orienta ema no transmite siénsia no teknolojia oin-oin ba ema seluk (estudante sira). Bainhira hala’o papel sira hanesan ne’e, klaru ke profesór ne’e rasik presiza domina kestaun hotu-hotu ne’ebé ligadu ho ninia profisaun rasik.

Manorin profisionál iha ninia atitude espesífiku, katak sira iha skill rasik atu fahe matenek no siénsia ne’ebé sira iha, valór profisionál sira ne’ebé sira aprende no sira fahe mós sira-nia umanidade ba iha ema ne’ebé sira hanorin. Ho kapasidade sira hanesan ne’e, profesór profisionál iha abilidade atu hala’o profisionalizmu kontínua, halo auto-motivasaun, auto-disiplina, vinkula ka regula ninia aan mesak no iha kapasidade atu avalia rasik ninia aan, halo konxientimentu ba ninia aan, kontinua dezenvolve no atualiza ninia koñesimentu iha aspetu hotu-hotu, iha sensibilidade atu tulun ema seluk no liu-liu mós hatene integra aan ho ema seluk liuhosi kria relasaun serbisu ne’ebé efetivu no konfortável iha ninia servisu fatin.

Danim (2010) halo análize ida ba estudu balu ne’ebé sientista balu halo kona-ba tipu no karaterístika sira profisaun profesór nian, konklui ninia rezumu katak atu sai profesór ida profisionál, presiza iha kapasidade sira hanesan: kapasidade intelektuál ne’ebé hetan iha banku estudu, iha koñesimentu espesífiku kona-ba profesór, tékniku servisu ne’ebé komunikável, iha kapasidade “selforganization”, fó imporntánsia ba ema seluk nia interese, hatene kódigu étiku profisionál, iha responsabilidade no prontu simu sansaun ruma relasiona ho dezobidiénsia, iha direitu ba saláriu adekuadu no iha kultura ba profisionálizmu.

Para bele sai profesór ida profisionál, manorin sira labele hatene de’it ezije sira-nia direitu maibé mós tenke hatene kumpre sira-nia devér hotu. Iha aspetu ida-ne’e duni mak profesór sira presiza hatene no koñese kapasidade sira ne’ebé Danim temi iha leten. Bainhira manorin sira hatene ona kona-ba kapasidade hirak ne’e mak sira sei buka meiu hotu-hotu atu hadi’a sira-nia aan no ho nune’e duni mak empeñamentu sira-nian iha servisu loro-loron nian bele efetivu no efikaz liután.

Atu sai profesór ne’ebé hanorin di’ak, la’ós de’it tenke hatene buat barak ka iha títulu akadémiku ne’ebé aas no barbarak, maibé pelu menus iha netik paixaun no sentidu umanidade. Paulo J. A. Victoria (2018) iha ninia artigu entituladu “A Vocação de ser Professór” ne’ebé publika iha MISSIO, descreve katak ensinar, acima de tudo, significa ser uma pessoa que sabe pôr-se a si mesmo à disposição dos outros. Antes de transmitir saberes e conceitos, deve transmitir um estilo humano, um ser-se pessoa. Ou seja, a primeira missão e paixão do professor é a humanidade vivida em si mesmo e na pessoa dos alunos. Aquele ou aqueles que estão ao seu cuidado são sobretudo pessoas, não números ou apenas comportamentos e capacidades.

Ne’e signifika katak sai profesór ne’e la apenas profisaun maibé mós vokasaun ida. Tanba ema ne’ebé sente hetan xamada atu sai profesór tenke iha domin ba ninia servisu rasik, la konsidera tarefa sira hanesan naha todan ida maibé servisu ida-ne’ebé tenke hala’o ho domin, ho responsabilidade, lealdade no ho konsiénsia tomak. Sai profesór la’ós “asal-asalan” maibé tenke konsiente katak hosi servisu ne’ebé nia halo, sei rezulta produtu sira mak kapitál umanu rasik.

Manorin Timorense ho ninia Bem Estar

Profesór ne’e nu’udar pilár importante ida ba nasaun atu dezenvolve kapitál umanu. Lahó profesór mak kualker nasaun ida sei la iha kapitál umanu potensiál no kualifikadu ne’ebé bele lori prosesu dezenvolvimentu ba oin. Buat ne’ebé sai iróniku uitoan ka bele dehan buat ne’ebé sai preukupasaun boot ba iha profesór sira iha Timor-Leste mak kestaun bem estar ka moris di’ak profesór sira-nian. Hosi Governu ida ba Governu seluk, laiha polítika ida mak fó netik esperansa ba profesór sira katak sira-nia bem estar ne’e sei sai atensaun espesiál ba governante sira.

Profesór maioria mak sei moris ho kondisaun ekonómiku ne’ebé mínimu tebe-tebes. Profesór barak sei moris iha liña pobreza nia okos no ida-ne’e nunka sai preokupasaun ba ukun-na’in sira. Buat ne’ebé mosu mak ezijénsia sira-ne’ebé obriga atu profesór sira tenke servisu no servisu to’o dolar didi’ak ho saláriu ne’ebé la sufisiente ba fornesimentu nesesidade uma laran. Tanbasá? Tanba polítika salariál ba profesór sira seidauk sai prioridade ba atensaun governante sira-nian. Karik mak Estadu iha ona polítika di’ak ba kestaun bem estar profesór sira-nian no iha polítika di’ak kona-ba subsídiu profisionál profesór nian, mak ha’u fiar katak profesór sira-nia bem estar bele garantidu no ho nune’e mak sira sei asume sira-nia responsabilidade ho rezultadu ida di’ak liután.

Diploma Ministerial Nú. 20/ME/2010 de 24 de agostu aprova mós tabela salariál ida ba profesór timorense tuir ninia kategoria profisionál no eskalaun, fó saláriu másimu ba iha profesór seniór ho montante $600.00, enkuantu saláriu másimu ba profesór sira ho eskalaun neen (6) atinje de’it montante $400.00. Tabela salariál ida-ne’e signifika katak bainhira profesór ida atinje ona eskalaun neen (6) hosi kategoria profisionál mak profesór refere sei hela permanente ho saláriu másimu  $400.00 no sei laiha tan aumenta saláriu ba oin mezmu iha dezempeñu ne’ebé di’ak ou mezmu nia aumenta tan ninia grau akadémiku iha universidade ka institutu ruma. Anaunser ke nia liu teste ba iha profesór senior mak nia sei hela metin ho saláriu $600.00 to’o nia mate no sei laiha tan aumentu ruma.

Tabela salariál ida-ne’e la garante moris di’ak ida ba profesór sira, satán atu motiva manorin sira hodi bele dezempeña didi’ak sira-nia funsaun iha eskola. Ida-ne’e mosu tanba saláriu ne’ebé manorin sira iha la atinje ka la kobre nesesidade uma laran nian, nune’e, obriga sira tenke halo servisu seluk ou halo mós negósiu ruma para ke bele aumenta sira-nia rendimentu. Enkuantu ho saláriu ki’ik kustu ba moris iha Timor-Leste rasik aumenta karun ba beibeik, nune’e montante saláriu ida-ne’e la responde nesesidade tomak ne’ebé profesór ho ninia família sira enfrenta.

Se ita kompara karik ho saláriu ba profesór sira iha Indonézia ba eskalaun haat ba kategoria profisionál, sira-nia saláriu másimu atinje Rp5.901.200 ka ekivalente ho $415.58. Aleinde saláriu ida-ne’e, profesór sira iha Indonézia sei iha mós direitu ba abono familiár (tunjangan keluarga) no subsídiu seluk tan. Nune’e, pelumenus bele fó rendimentu ida natoon ba profesór sira no ho nune’e mak sira empeña didi’ak ho sira-nia knaar ne’ebé sira iha no fó rezultadu di’ak ba ensinu ida kualidade. Aleinde ne’e, saláriu ba profesór sira iha Indonézia aumenta gradualmente kada tinan rua dala ida, nune’e motiva tebes profesór sira atu ezerse sira-nia funsaun. Se ita kompara tan ho saláriu ba profesór sira iha Singapura mak tuir linguajen fo’in sa’e sira-nian, ita bele dehan ko’alia mak la di’ak.

Komparasaun ida-ne’e lahó objetivu atu obriga ita-nia Estadu liu hosi MEJD tenke hasa’e manorin sira-nia saláriu hanesan kedas ho saláriu ba manorin sira iha Singapura, lae! Ka dehan katak ho komparasaun sira-ne’e hatudu katak manorin sira iha Timor-Leste matan osan, mós lae! Maibé atu dehan nível salariál ne’e iha relasaun metin ho ema ruma ninia bem estar no kondisaun ida-ne’e sei fó implikasaun pozitivu ba ema ruma ninia empeñamentu inklui profesór sira. Bainhira nia servisu ho saláriu di’ak, nia sei la hanoin tan servisu seluk, pelu kontráriu konsentra de’it ba ninia servisu no ne’e, konserteza sei fó rezultadu di’ak mós.

Maria Izabel de Almeida (2012, p. 22) esplika kompeténsia ne’ebé profesór ida iha influensiadu hosi fatór internál no mós fatór eksternál. Fatór internál hosi profesór sira mak hanesan: kapasidade atu hanoin, motivasaun, esperiénsia, atitude, auto-disiplina, istória akadémiku, étika servisu nian no vontade atu kontinua dezenvolve aan. Enkuantu fatór eksternal sira mak hanesan: ambiente fíziku eskola nian, fasilidade no materiál didátiku sira, insentivu no saláriu ne’ebé adekuadu no polítika públika ba bem estar profesór sira-nian. Hosi fatór rua ne’e iha korelasaun ba malu no bainhira profesór ida atinje hotu fatór hirak ne’e mak sei garante kualidade pesoál hosi profesór refere no bele mós fó implilkasaun pozitivu ba kualidade ensinu no aprendizajen.

Entaun bele dehan katak fatór bem estar (insentivu no saláriu ba profesór no polítika públika ba moris di’ak profesór nian) la’ós fatór independente ida maibé fatór ida-ne’e mós sai sasukat ida atu profesór sira bele empeña sira-nia papel ho totalidade iha prosesu ensinu aprendizajen iha situasaun sa’ida de’it. Sira sei la sente baruk ka tenke halai ba halo servisu seluk tanba profisaun ne’ebé sira iha, garante ona kualidade moris nian ne’ebé seguru.

Profesór nu’udar Eroi sein Rekoñesimentu nia Leet

Loron 05 fulan outubru kada tinan, mundu tomak selebra loron mundiál ba manorin sira nu’udar hahalok ida atu valoriza no fó nafatin motivasaun ba manorin sira iha mundu tomak. Selebrasaun ne’e liuliu atu relembra fila-fali papel importante ne’ebé manorin sira halo ona iha prosesu sivilizasaun no dezenvolvimentu planeta ida-ne’e nian. Loron 05 outubru konsideradu nu’udar loron mundiál ba manorin sira ka “World Teacher’s Day” tanba iha loron ida-ne’e duni mak adota rekomendasaun hosi Organizasaun Traballador Mundial (ILO) nian kona-ba estatutu manorin sira-nian. Laiha serimónia espesiál hodi komemora loron ida-ne’e, maibé iha país balu selebrasaun loron ida-ne’e enxe ho atividade sientífika oin-oin ne’ebé iha ninia “nuansa” ho serbisu profesór sira-nian.

Iha Timor-Leste rasik, laiha selebrasaun espesiál ba loron ida-ne’e. Ministériu Edukasaun, Juventude no Desportu rasik de’it mós laiha programa ruma espesífiku ba programa ida-ne’e. Até iha eskola sira de’it mós, manorin sira rasik la hatene katak loron 05 fulan outubru ne’e dedikadu espesiál ba manorin sira. Primeiru-Ministru, Taur Matan Ruak, embora eis gerilleiru ida no okupadu ho aprezentasaun OGE 2020 iha Parlamentu Nasionál maibé sei bele husik nia tempu balu atu felisita manorin sira Timor-Leste nian ho lia menon furak balu.

Iha ninia lia menon ne’e, Xefe Governu rekoñese profesór sira nu’udar eroi loloos sein rekoñesimentu. Eis Jenerál ho fitun rua ne’e konsidera papel, empeñu no kontribuisaun hosi manorin sira eduka sosiedade timorense. Ba Taur Matan Ruak, profesór nu’udar pilár  importante ne’ebé bele molda (forma) karáter estudante sira sai ema edukadu no iha valór ba sosiedade. Rekoñesimentu sira hanesan ne’e, pelu-menus fó netik espíritu ba manorin sira atu bele serbisu di’ak liután, tanba sei iha líder nasaun nian balu ne’ebé konsidera papel importante hosi manorin sira.

Francisca santos (2011) iha ninia artigu entituladu Professor Um Heroi no Anonimato deskreve katak “Professores são heróis quando travam uma luta em cada dia de trabalho, uma batalha com diferentes guerreiros e personalidades , quando têm que acalmar os ânimos em uma classe lotada, quando têm que ser artistas para criar,  planeiar aulas diferentes a cada dia a fim de  motivar os alunos e não deixá-los cansados e entediados, quando têm que trabalhar em dobro ou triplo para conseguir o mínimo de sustento para suas famílias, quando são acusados de  culpa pela não aprendizagem dos alunos”.

Profesór sira kala eroi ida duni, maibé eroi ida-ne’ebé ema barak la koñese. Sira-nia luta iha batalla bele oin seluk hosi luta sira seluk maibé luta hirak ne’e susar atu hetan rekoñesimentu ida ne’ebé dignu. Iróniku tebes, tanba iha Timor-Leste rasik, profesór sira tenke servisu dobru atu hetan suporta mínimu hosi ninia família rasik maibé iha sorin seluk sira akuzadu ho sala oin-oin hasoru nia estudante sira.

Iha fatin balu, profesór sira komesa ona hetan baku, atake fíziku hasoru sira-nia aan sein fó tempu ba sira atu justifika sira-nia hahalok, inan-aman barak insulta profesór iha eskola ba sala ne’ebé tuir loloos estudante mak asume, jeneralizasaun ba profesór katak profesór hatene de’it manan osan no selu-seluk tan. Laiha grupu ka individu ruma mak abertamente sai defensór ba manorin sira bainhira sira enfrenta situasaun hirak ne’e. Manorin timorense ninia pozisaun mak sala no sala hela de’it.

Biar enfrenta situasaun sira kruel hanensan ne’e, profesór sira nafatin iha vontade atu servisu ho sira-nia limitasaun tomak. Sira-nia objetivu ida de’it: lori sira-nia estudante ba dalan ne’ebé loos ho siénsia no teknolojia ne’ebé sira hanorin loro-loron. Nu’udar eroi sein rekoñesimentu, profesór sira-nia esperansa mak Estadu presiza kria kondisaun ne’ebé dignu no komunidade em jerál bele apoiu no suporta sira iha prosesu formasaun ida-ne’e. Tanba, kestaun edukasaun ne’e nu’udar responsabilida koletiva hosi manorin sira, estudante sira no aman-inan sira no konserteza ho apoiu morál no polítika hosi Estadu. Grupu koletiva hirak ne’e mak hamutuk lori edukasaun ida-ne’e ba atinje ninia metas. Viva Profesór timorense!

*) Hakerek na’in nu’udar profesór Biolojia ida iha Eskola Sekundária Públika Olocassa Ossú (Viqueque) no hela iha Ossú.

HAKEREK NO HATÁN

Please enter your comment!
Please enter your name here