Makina Imprime. Google

DILI, 14 outubru 2020 (TATOLI)–Ministériu Edukasaun Juventude no Desportu (MEJD), iha tinan 2018 liubá la kontinua estende kontratu ba pesoál tékniku 32 ne’ebé maka halo operasaun ba mákina imprensaun ministériu nian iha Comoro tanba ne’e la funsiona durante tinan 2019 to’o 2020 ne’e.

Koordenadór Unidade Sentru Impresaun Comoro, Helder Aparício Guterres, rekoñese mákina ne’e la uza durante tinan rua, tanba laiha tékniku atu halo operasaun ba mákina refere.

Notísia Relevante :MEJD sei prepara tékniku halo operasaun ba mákina impresaun Comoro

“Ita-nia tékníku timoroan na’in 32 ne’e ninia kontratu ramata iha 2018 depois ministériu  mós la estende sira-nia kontratu, ne’e duni husi inísiu 2019 to’o agora mákina sira-ne’e paradu,” Koordenadór ne’e informa ba Tatoli iha ninia servisu fatin, kuarta ne’e.

Sentru Impresaun MEJD Comoro iha mákina hamutuk unidade 22 ne’ebé maka antes ne’e oferese husi Ajénsia KOICA iha Timor-Leste.

Iha tinan 2017 no 2018, Sentru Impresaun MEJD maka responsabiliza hodi prodúz matéria ezame nasionál tanba pesoál tékniku timoroan na’in 32 no tékniku espesializada na’in ida husi nasaun Korea ne’e, sira-nia kontratu sei válidu hela.

“Esperiénsia 2017 no 2018, ami halo ona prosesu impresaun ba pontus ezame nasionál iha sentru ne’e, maibé buat hotu sai paradu iha 2019,” nia esplika.

Ministériu Edukasaun Juventude no Desportu foin lalais ne’e halo ona observasaun ba mákina refere ho objetivu atu imprime matéria ezame nasionál maibé kestaun falta rekursu umanu maka Governu loke konkursu públiku to’o ikusmai Kompañia Sylvia maka manán konkursu ne’e.

“Agora ita iha de’it servisu administrasaun, asesór tékníku sira-ne’e ita bele utiliza ba operasaun mákina dijitál de’it ho volume ki’ik. No ita iha de’it  funsionáriu na’in 10 mak servisu maibé la’ós ema espesializada ba mákina boot sira-ne’e,” Koordenadór Unidade Sentru Impresaun Comoro, Helder Aparício Guterres, hateten.

Nia hatutan atu responde situasaun ne’e maka MEJD iha tinan 2019 liubá halo ona rekrutamentu ba tékniku sira atu substitui na’in 32 ne’ebé maka sira-nia kontratu ramata iha 2018.

“Ami rona katak prosesu rekrutamentu ba tékniku-sira atu koloka mai sentru impresaun ne’e hahú ona iha 2019 no buat hotu la’o ona no agora iha ona rekursu umanu ninia liman. Tuir informasaun ha’u simu husi rekursu umanu katak tékniku sira-ne’e sei hahú servisu depois Prezidente Repúblika promulga orsamentu 2020,” nia dehan.

Notísia Relevante :MEJD kontrata Sylvia imprime matéria ezame nasionál

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here