Hakerek nain, Elidio Agusto Guterres.

(Reflesaun badak, husik “rasio” hatene Timor nia polítika)

Hosi: Elidio Agusto Guterres*)

Hahú kolonializmu Portugés mai to’o okupasaun Indonézia no ukun-aan iha sekulu 21, Timor-Leste hakat ona realidade polítika lubuk ida iha istória. Istória hirak ne’e hanesan realidade moruk no midar “polítika” ne’ebé timoroan hasoru. Depois ukun aan, Timor-Leste mós sei hasoru dezafiu barak. Ita bele dehan, krize hirak ne’ebé mosu depois de ukun aan iha tinan 2006 mai to’o 2009, hanesan mós esperiénsia moruk hosi diferensia polítika. Mai iha tinan 2018 to’o mai 2020, Timor-Leste mós moris no hela iha krize polítika (impasse politika) nia laran. No, impase polítika ka krize polítika ida-ne’e hamosu krize ekonomia no Timor-Leste tama iha kategoria nu’udar nasaaun ne’ebé ki’ak iha Asia. Realidade ida-ne’e mó hatudu esperiénsia moruk hosi diferensia polítika.

Tuir Hobbes, politika hirak ne’e akontese tanba mentalidade ema nu’udar umanu ne’ebé egoistiku, si’ak, la satisfas ho saida mak nia iha ka hetan. Tanba ema sai asu-fuik ba nia emar sira (homo homini lupus) no tanba ida-ne’e ema sai sentru problema sosiál no polítika (Budi Hardiman, 2007: 70).

Bainhira ita haree realidade polítika agora ho hanoin Thomas Hobbes, homo homini lupus, ha’u bele dehan krizi polítika iha Timor-Leste agora ne’e mosu, tanba mentalidade polítiku sira ne’ebé la satisfas atu hetan ukun. Tanba ne’e, polítiku sira kontra totalmente sira-nia inimigu polítiku ho jurus against total. Ho hanoin estrim ita bele sita liafuan Thomas Hobbes belllum omnium contra omnes/semua manusia akan berperang melawan semua  (Ahmat Suhelmi, 2001: 172). Atu hatene kle’an liu polítika Timor-Leste ho hanoin no reflesaun ne’ebé kle’an ho fundasaun pensamentu polítika Thomas Hobbes. Iha parte tuir mai ha’u koko lori leitór sira atu hatene sé loos mak Thomas Hobes no nia pensamentu polítika.

Thomas Hobbes no nia Pensamentu Polítiku

Thomas Hobbes filosofu empirista hosi Inglatera, moris iha tinan 1588 no mate iha 1679. Nia moris iha situasaun polítiku ne’ebé anarkizmu iha sekulu 17. Situasaun hirak ne’e mak hanesan, konfrontu entre Igreja Anglikanu no Katólika, konfrontu sivíl, no liuliu konfrontu entre liurai no parlamentu iha tempu Charles I. Situasaun hirak ne’e mak doko Hobbes nia hanoin hodi hamosu leitura lubun ida. Letura Hobbes ne’ebé famozu liu mak “Leviatan” (Harun Hadiwijono, 2005: 31-32).

Leviatan hanesan livru ne’ebé importante tebes atu hatene pensamentu polítika Hobbes nian. Iha nia peskiza/reflesaun kona-ba situasaun sosiál polítika iha Inglatera tempu ne’ebá, Hobbes foti konklusaun, primeiru, problema ka konflitu relijiaun, sivíl no konflitu sosiál polítika hirak ne’ebé mosu iha tempu ne’ebá, tanba iha frakeza ukun-na’in sira nian. Segundu, konfrontu ka konflitu sira sei lakon ka bele rezolve no armonia bele mosu, bainhira ukun la nakfera ka metin (Ahmad Suhelmi, 2001: 165).

Iha parte dahuluk livru “Leviatan”, Thomas Hobbes hateten karáteristika ema naturalmente egoistiku, kruel, nst, ka simplesmente bele dehan naturalmente ema ne’e la di’ak. Tanba karáteristika naturál ida-ne’e mak mosu konfrontu no konflitu iha sosiedade. Liuhosi karáteristika naturál umana ida-ne’e mak Hobbes ko’alia kona-ba state of nature to’o ba iha nasaun (Reza Wwatimena, 2011: 20). Tanba ne’e, atu hatene kle’an pensamentu polítiku Hobbes, ita presiza haree no hatene state of nature (estadu natureza), state of war (estadu guerra/funu) no nasaun.

Tuir Hobbes molok iha nasaun ema moris iha ambitu state of nature/estadu natureza. Iha state of nature, Hobbes fó hanoin katak naturalmente ema ne’e egoizmu, si’ak, kruel, no seluk tan. Mentalidade ka hahalok ema ne’ebé kruel, egoizmu sira-ne’e mak hamosu state of war. Ema ida-idak defende ninia aan rasik hodi hetan saida mak nia hakarak no kontra totalmente ema ne’ebé mak hakarak kontra ka hapara ninia hakarak. Hosi ida-ne’e mak Hobbes hateten, homo homini lupus (ema sai asu fuik ba ema seluk) no tanba ida-ne’e ema iha bellum Omnium contra omnes (guerra contra todos).

Hobbes hateten mós konfrontu entre ema ne’e mosu tanba iha fatór tolu ne’ebé sai baze ba konfrontu. Primeiru, sentimentu naturál ema-nian atu hetan buat ne’ebé boot no di’ak liu. Atu hetan ka atinje saida mak nia hakarak nia prontu mate no hamate ema seluk. Karáteristika ne’e mak Hobbes bolu, anti sosiál. Segundu, fatór igualdade umanu. Hanesan mensiona iha leten, naturalmente ema iha karáteristika ema ida la boot ka forsa liu ema seluk. Ida sempre hakarak boot ka forsa liu ida seluk. Naturalmente ema iha karáteristiku agresivu atu defende nia aan. Terseiru, fatór relijiaun. Relijiaun mós bele sai fatór ida-ne’ebé hamosu konfrontu ka konflitu entre ema iha sosiedade. Pensamentu ida-ne’e mosu tanba Hobbes, hasoru no moris iha ámbitu konflitu entre Igreja Anglikanu no Igreja Katóliku iha tempu ne’ebá. Maibé Hobbes ladún gosta atu ko’alia kona-ba fatór ka pontu ida-ne’e. Iha ne’e atu hateten de’it, relijiaun mós bele sai fatór ida-ne’ebé bele hamosu no hanaruk problema sosiál (Ahmad Suhelmi, 2001: 172-174).

Iha parte segundu livru “Leviatan” nian, Thomas Hobbes hatuur nia pensamentu oinsá ema ne’ebé egoistiku, kruel, ou ita bele dehan ladi’ak ne’e bele moris armonia. Tuir Hobbes, atu hetan armonia presiza iha kontratu sosiál hodi evita ka hapara guerra sira ne’ebé iha. Kontratu sosiál sai hanesan dalan ida hodi hadi’a estate of nature no estate of war. Liuhosi kontratu sosiál mak hamosu nasaun no nasaun ne’e tenke ukun hosi ema ne’ebé forte. No, ukun-na’in iha dever absoluta atu ukun nia povu, tanba tuir Hobbes estadu ne’ebé di’ak mak monarkia absoluta. Monarkia absoluta ne’e sai sistema ne’ebé di’ak atu Estadu labele nakfera no labele iha konflitu. Maibé pontu importante ne’ebé ita tenke hatene no kaer mak, Thomas Hobbes la ko’alia klaru kona-ba monarkia absoluta. Iha livru “Leviatan” ne’e, Hobes hateten deit Estadu ne’ebé di’ak mak monarkia absoluta hodi haree no hametin Estadu (Reza Watimena, 2011: 20).

Polítika Timor-Leste no Polítika Hobbes

Iha parte ida-ne’e, ha’u hakarak lori ita haree fali karáteristika polítika iha tempu pasadu. Tempu ne’ebé Timor-Leste hetan kolonia hosi Portugés durante tinan 450 no tempu okupasaun Indonézia durante tinan 24 nia laran, no sei lori ita mai to’o tempu ukun rasik-aan (impase polítika). Ida-ne’e, la signifika atu loke fali memória nakukun ne’ebé ita hasoru iha pasadu. Lae! Ida-ne’e dalan ida husik rasio hatene de’it polítika Timor-Leste ho baze pensamentu polítika Hobbes.

Iha tinan 1911-1912, iha Timor-Leste mosu manu-aman ka asu’ain ida-ne’e brani tebe-tebes ho nia polítika kontra totál koloniál portugés. Liurai Don Boaventura hanesan asu’ain polítiku ne’ebé brani hasoru kolonializmu portugés iha tempu ne’ebá. Movimentu polítika Boaventura kontra koloniál Portugés ne’ebé agora ita uza sira-nia lingua tempu ne’ebá ema hanaran rebelião Manufahi ka rebelião Boaventura (Geoffrey C. Gunn, 2005: 257).

Boaventura hanesan iis moris timoroan nian iha ninia tempu, iha biban ne’ebá. Nia mai hanesan lider asu’ain ida ho karáteristika polítika ne’ebé ita bele dehan bellum omnia contra omnes ka guerre contra todos. Ha’u bele dehan, Boaventura haree kolonializmu Portugés hanesan asu-fuik ba povu Timor ka ho liafuan Tomas Hobbes homo homini lupus/ema sai-asu fuik ba nia emar sira. Pergunta simples ne’ebé mosu mak ida-ne’e; Tanba saida mak realidade ida-ne’e akontese? Istória hateten momoos durante kolonializmu portugés, edukasaun falla totalmente, dezenvolvimentu laiha, povu sai atan ba kolonialista portugés hodi simu tratamentu baku, tarata, nst. Povu Timor hanesan povu primitivu, beik-teen no laiha kapasidade to’o sira bolu ho naran “maubere” ho signifika ki’ak, terus, susar, laiha kapasidade (Hellen Mary Hill, 2000: 11). Tanba ida-ne’e, nu’udar liurai, karáteristika naturál tuir Tomas Hobbes mosu iha Boaventura. Tenke iha Polítika no forsa atu hasoru kolonialista Portugés hodi defende dever nu’udar timoroan no na’in ba rai Timor-Leste.

Don Boaventura hanesan figura exemplár mai timoroan sira seluk. Jerasaun Nicolau Lobato, Xavier do Amaral mai to Xanana Gusmão, José Ramos Horta no sira seluk, kontinua polítika kontra kolonializmu, imperializu ho karáteristika kontra totál, ne’ebé Boaventura hatudu ona iha tempu pasadu. Depois kolonializmu portugés, mai iha tempu okupasaun Indonézia, karáteristika polítika sei hanesan tempu uluk “kontra totalmente”. Iha tempu ida-ne’e, Indonézia sai inimigu ne’ebé povu Timor tau liman hamutuk hodi kontra ho ruin no raan. Inimigu ne’ebé tanke kontra totalmente ou ho liafuan Thomas Hobbes bellum omnium contra omnes/guerra contra todos.

Alende hosi ida-ne’e, iha konflitu polítika internu entre partidu polítiku sira hanesan Fretilin, Apodete no UDT to’o hamosu deklarasaun proklamasaun unilaterál/deklarasi kemerdekaan sepihak iha loron 28 novembru 1975 (Avelino M. Coelho, 2012: 36). Se ita haree ho justu realidade konflitu entre partidu, ne’e mosu tanda diferénsia polítika. No, diferénsia polítika ida-ne’e mosu tanba egoizmu individuál no partikulár. Egoizmu ida-ne’e mak Thomas Hobbes temi iha nia livru Leviatan, parte dahuluk, nia hateten karákteristika naturál ema-nian mak egoizmu, kruel, nst. Tanba ne’e mak hamosu konflitu no funu. Ikus mai, Hobes hateten ema sai asu-fuik ba nia emar sira ka homo homini lupus. Konflitu entre partidu ne’e mosu tanba karáteristika naturál ne’eb’e polítiku sira iha.

Atu rezolve problema homo homini lupus, tuir Thomas Hobbes tenke iha kontratu sosiál. Hosi kontratu sosiál ne’e mak harii nasaun ho ninia lei (konstitusaun) sira no iha nai-ulun ida mak ukun. Se ita haree situasaun polítika Timor-Leste nian iha tempu ne’ebá (konflitu entre partidu), Timor-Leste iha mós ninia polítika ne’ebé ita bele dehan kontratu sosiál ne’ebé bele hakuak hotu partidu sira ne’ebé konflitu. Xanana Gusmão, lider úniku no karismatiku ne’ebé hamosu kontratu sosiál ida-ne’e. Kontratu polítika sosiál ida-ne’e mak polítika unidade nasionál ne’ebé bele rezolve problema konflitu entre partidu sira iha tempu ne’ebá. Iha ne’e ha’u bele dehan, Xanana mai ho ninia polítika kontratu sosiál ka promesa sosiál hodi hamoris mentalidade unidade entre partidu ne’ebé konflitu to’o lori Timor ba hetan ukun aan no harii ninia nasaun no Estadu rasik.

Bainhira ita haree pasu ida tan lala’ok polítika Timor-Leste nian, depois ukun aan, karáteristika ema-nian ne’ebé egoizmu, kruel, ne’ebé Thomas Hobbes deklara mosu fali iha palku polítiku Timor-Leste. Rezultadu hosi ida-ne’e mak mosu krize 2006, hodi haterus no hamate povu barak. Dala ida tan, ida-ne’e mak realidade polítika ne’ebé Thomas Hobbes hanaran homo homini lupus. No, dala ida tan realidade nakukun ida-ne’e mosu no akontese tanba egoizmu hosi polítiku sira-nian atu atinje sira-nia hakarak. Iha ne’e mós Xanana mai ho nia espiritu no mentalidade unidade hodi rezolve konflitu ka ita bele dehan funu ida-ne’e. To’o iha ne’e, ba ha’u, Xanana hanesan aman ba unidade ka ho liafuan Thomas Hobbes kontratu sosiál.

La para iha ne’e de’it. Palku polítika Timor-Leste nian sempre hamosu teatru polítiku iha palku polítiku ho karáteristika ema-nian ne’ebé egoizmu, kruel, nst, ne’ebé Hobbes deklara. Hahú hosi tinan 2017 to’o mai iha tinan 2020, impase polítika mosu no mosu beibeik. No, tuir ha’u-nia hanoin, pontu kulminasaun hosi impase polítiku durante tinan tolu nia laran mak meja parlamentu rahun. Maibé ida-ne’e la signifika katak problema impase politika nia rohan iha ne’e. Lae!! Problema polítika sei iha no iha espiritu iha nafatin, bainhira la kaer metin kontratu sosiál ka ita bele dehan kontratu polítiku ne’ebé polítiku sira halo.

Ba ha’u pesoalmente, aktu meza parlamentu rahun hanesan aktu inkapasidade nu’udar reprezentante povu nian. Aktu hatun dignidade povu Timor nian iha mundu nia oin. Pergunta simples de’it; tanba saida mak aktu ida ne’e bele akontese? Ha’u atu hateten de’it ida-ne’e akontese tanba nai-ulun sira sei kaer metin karáteristika nu’udar ema nian ne’ebé Thomas Hobbes sita iha nia livru Leviatan, egoizmu, kruel, nst. No, ha’u bele dehan, karáteristika polítika Timor nian to’o agora, tuir karáteristika state of nature ne’ebé Thomas Hobbes hatuur. No, tanba ida-ne’e, ba ha’u, polítika Timor-Leste dalaruma mai ho polítika represivu.

No ikus liu, molok atu taka artigu ida-ne’e, ha’u atu soe de’it deklarasaun hosi filozofu Jhon Lock nian hodi ita bele refleta liután ita-nia polítika iha Timor. Deklarasaun ida-ne’e bazea ba aktu polítiku meza parlamentu rahun, hadau poder no viola konstitusaun ne’ebé ema barak hateten. Jhon Lock hateten nune’e, Whenever law ends, tyranny begins (bainhira lei ka konstituisaun para ka ita hakur, tirania hahú mosu). Oinsá ho ita-nia situasaun polítika iha Timor-Leste agora? Ba ha’u, tirania hahú ona mosu iha ita-nia palku polítiku, maibé ita mak seidauk sente tanba haree buat hotu ho matan politika. Oinsá ho ita? Mai ita refleta hamutuk.

Lian maktaka

Pensamentu polítiku Thomas Hobbes loke ita-nia hanoin atu hatene ita-nia polítika iha Timor Leste. Bazea ba pensamentu polítika Hobbes no polítika Timor-Leste iha leten, ita bele halo hipotesa ida katak, polítika Timor-Leste nian agora mak polítika contra todos. Polítika kontra polítiku ne’ebé diferénsia polítika hodi atinje ninia objetivu polítiku. No, ida-ne’e mosu tanba karáterisku ema-nian ne’ebé egoizmu. Hakarak hetan buat ne’ebé di’ak no di’ak liután hosi ema seluk. No, to’o iha ne’e, ita bele sita deklarasaun hosi Thomas Hobbes, homo homini lupus ka ema sai asu-fuik ba nia emar sira, tau iha politika Timor-Leste. Signifika, polítiku sira sai asu fuik ba polítiku sira seluk. Tanba ne’e, iha politika contra todos ka tuir Thomas Hobbes, dehan katak bellum omnium contra omnes.

 *) Hakerek na’in alumni Universitas Gajah Mada (UGM) no dosente Filozofia, Institutu Superiór Filozofia no Teolojia (ISFIT)

1 KOMENTÁRIU

  1. Wainhira hau halo leitura ba artigu ida nee, hau bele konklui katak ita boot haree/observa problema impasse politika Timor hahu husi 2017 too 2020,haree husi sikun moral ka konsiensia deit signifika haree problema refere la ho totalidade tanba la konsege haree kontradisaun neebe sai fundamentu hodi sai kauza ba hamosu impasse politika.abrasus

HAKEREK NO HATÁN

Please enter your comment!
Please enter your name here