Ilustrasaun vítima violasaun seksuál. Imajen/ Google

DILI, 14 outubru 2020 (TATOLI)–Figura paterna  hanesan mahon ka maksoin ba oan no família uma-laran. Ida-ne’e, la sente hosi F, estudante feto ida iha sidade Dili ne’e, tenke moris trauma no ta’uk tanba nia vítima ba aktu “insestu” ka imorál hosi nia aman rasik ba kazu violasaun seksuál.

Aktu vergonhoso ne’ebé komete hosi aman rasik ne’e, akontese iha loron 10  fulan outubru, foin lalais ne’e, purvolta tuku 10:00 Otl, iha suku ida iha area jurisdisaun kapitál Dili nia sikun.

Kazu ne’e, ohin, submete ona ba primeira interrogatóriu iha Tribunal Distritál Dili (TDD) no liuhosi desizaun primeira instánsia nian aplika medida koasaun prizaun preventiva ba arguidu VS tanba iha indísiu forte halo violasaun seksuál hasoru nia oan feto rasik ho inisiál F.

Kronolojia ne’ebé arrola hosi Ministériu Públiku (MP) katak kazu ne’e akontese iha loron 10 fulan outubru, tinan ne’e, purvolta tuku 10:00 Otl, iha suku ida ne’ebé pertense ba area jurisdisaun Munisípiu Dili nian.

Momentu ne’ebá, F nia mama nu’udar arguidu nia espoza ba tiha  to’os.  Nune’e, arguidu ho nia oan feto  mesak hela uma. Lezada hanesan oan feto husu osan ba nia aman (arguidu, red) atu ba eskola,  maibé arguidu fó tiha osan,  obriga no rasta nia oan feto halo relasaun seksuál.

Kazu ne’e to’o iha polísia nia tilun no tempu ne’ebá polísia bolu kedas arguidu hodi ba presta deklarasaun, maibé fila ba uma, arguidu uza forsa ameasa kedas nia espoza ho nia oan feto F.

Ministériu Públiku (MP) akuza arguidu ho krime tolu hanesan violasaun seksuál, arma branka ho tentativu omisídiu.

Defensor Públiku, Humberto Alves, ne’ebé fó asisténsia legal ba arguidu hateten, tribunál aplika medida ne’e tanba tribunál konsidera faktu ne’ebé  iha prienxe duni kritéria  ba tipu krime ne’ebé MP  imputa ba arguidu.

“Maibé kazu ne’e konforme arguidu deklarasaun katak momentu lezada mak hakarak la’ós arguidu mak obriga no lezada la’ós menoridade,”  Advogadu Humberto Alves hateten hodi afirma tan nia parte sei halo rekursu ba Tribunál dentru prazu loron 15 nia laran.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here