Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/10). Imajen Tatoli/Egas Cristovão

DILI, 14 outubru 2020 (TATOLI)–Molok halo alterasaun dahuluk ba dekretu-lei númeru 3/2014 kona-ba estatutu Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL), Konsellu Ministru (KM) rona uluk aprezentasaun hosi Prezidente Autoridade, Arsénio Paixão Bano, ba opsaun polítika-lesjislativa subjasente.

“Alterasaun dahuluk ba estatutu ne’e hakarak atualiza kompeténsia no atribuisaun, armonizasaun estatutu ho inisiativa lejislativa relevante seluk inklui rezolusaun ba lakuna hirak ne’ebé eziste,” Ministru Prezidénsia Konsellu Ministru, Fidelis Manuel Leite Magalhães, relata reuniaun ezekutivu iha Palásiu Governu, kuarta ne’e.

Maski nune’e seidauk iha desizaun ba inisiativa ne’e no sei aprezenta no diskute kle’an iha reuniaun KM tuir mai.

“Foin aprezenta de’it dokumentu no iha tempu oin mai sei hato’o filafali. Tanba ámbitu Konsellu Ministru ne’e rona uluk aprezentasaun hosi proponente sira ba opsaun polítika lejizlativa molok simu dokumentu legál sira no halo diskusaun kle’an kona-ba substánsia hosi diploma legál sira ne’e,” Fidelis esklarese.

Antes ne’e, iha loron 08 jullu 2019, Parlamentu Nasionál altera lei númeru 3/2014 estatutu ba kriasaun RAEOA no ZEESM, ba artigu rua hanesan, iha artigu 19 ne´ebé ko’alia kona-ba rekezitu kandidatura Prezidente Autoridade ne´ebé antes ne´e seidauk halo alterasaun ba artigu no vigora hela.

Kanditatu ba Prezidente RAEOA maka timor-oan ne’ebé ho idade 35, ninia mandatu renovável no susesivamente no bainhira mandatu hotu bele renova.

Alende ne’e, deputadu sira halo alterasaun iha artigu 21 hosi lei kriasaun RAEOA-ZEESM nian ne´ebé antes vigora husi artigu ne´e deskreve katak, Prezidente RAEOA hetan aprovasaun no pose hosi Prezidente Repúblika liuhosi proposta primeiru-ministru nian.

Maibé, komparasaun ho alterasaun lei ne´e hosi artigu 21 ne´ebé alteradu dehan katak simplesmente Primeiru-Ministru mak aprova proposta nomeasaun no fó pose liuhosi rezolusaun Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here