Austrália Humanitarian Partnership (AHP) ne’ebé kompostu hosi konsorsiu Care Internasionál, Caritas Australia, Oxfam, Plan Internasionál, World Vision no Ra’es Hadomi Timor, halo enkontru hodi diskute planu no prioridade sira ba implementasaun projetu redusaun risku dezastre iha TL. Imajen/Espesiál

DILI, 14 outubru 2020 (TATOLI)-Austrália Humanitarian Partnership (AHP) ne’ebé kompostu hosi konsorsiu   Care Internasionál, Caritas Australia, Oxfam, Plan Internasionál, World Vision no Ra’es Hadomi Timor, ohin, iha salaun enkontru Ministériu Interior (MI), Vila Verde, Dili, diskute planu no prioridade sira  ba ezekusaun ka implentasaun projetu redusaun risku dezastre iha Timor-Leste (TL).

Notísia Relevante : TL komemora loron mundiál redusaun risku dezastre

“Ohin ne’e  eventu ida ita halo diskusaun ho parseira sira umanitária Austrália nian hala’o fila-fali revizaun ba programa ne’ebé durante ne’e implementa ona iha projetu redusaun risku dezastre no saida mak sei halo iha 2021,” Council Human Development Embaixada Australia iha Timor-Leste, Carli Shilito, hateten.

Antes ne’e Australia Humanitarian Partnership (AHP) asina ona akordu kooperasaun ho Sekretária Estadu Protesaun Sivíl (SEPS) hodi apoiu fundu millaun A$105.2 (Dollar Australia)  ba  implementasaun projetu redusaun risku dezastre periodu 2018-2020.

Projetu ne’e finansia fundu mai hosi Governu Austrália no implementa hosi konsorsiu  parseiru Care Internasionál, Caritas Australia, Oxfam, Plan Internasionál, World Vision no Ra’es Hadomi Timor,  hodi implementa programa kuda ai-oan hodi prevene rai monu, konstrui ponte ka dalan  ba fatin sira ne’ebé identifika sai risku iha komunidade hodi próteze bainhira iha udan boot inklui atividade sira seluk.

Fatin ne’ebé sai alvu ba implementasaun projetu redusaun risku dezastre  maka munisípiu  sia (9) hanesan, Aileu, Ainaro, Bobonaro, Covalima, Viqueque, Baucau, Lautem, Manufahi no Rejiaun Administrativu Oe-Cusse Ambeno (RAEOA).

Council Human Development Embaixada Australia iha Timor-Leste, Carli Shilito hateten, asaun sira-ne’e hodi halo prevensaun risku dezastre naturaís.

Nia hateten, projetu ne’e sei termina iha tinan ne’e, tanba ne’e, Austrália sei kontinua fó apoiu ba projetu ida  ne’e  ba planu finanseiru tinan 2020-2021 ne’ebé daudaun sei diskute hela programa prioridade sira hodi prevee ba nia orsamentu.

Carli Shilito  hatutan, Governu Australia mós sei  apoiu ba Timor-Leste relasiona ho dezafiu COVID-19 oinsá prevene infesaun ba transmisaun.

Diplomata Australiana ne’e afirma ,Timor-Leste hanesan nasaun ne’ebé importante tebes ba Austrália hodi apoiu dezenvolvimentu hodi implementa programa dezenvolvimentu ho prosperidade.

Sekretáriu Estadu Protesaun Sivíl, Joaquin Gusmão, agradese ba apoiu hosi  parseiru AHP ne’ebé  durante ne’e  implementa ona  programa lubuk no nia husu atu kontinua programa sira ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here