Lansamentu adezaun Timor-Leste ba SUN Movement iha salaun Ministériu Finansa, Aitarak-laran, tersa (13/10). Imajen Tatoli/Egas Cristovão

DILI, 13 outubru 2020 (TATOLI)—Governu Timor-Leste ofisialmente adere ona ba Movimentu Estimulasaun Nutrisaun/Scalling Up Nutrition (SUN) Movement liuhosi lansamentu ne’ebé mak hala’o hosi Primeiru-Ministru (PM), Taur Matan Ruak.

Pontu Fokál Timor-Leste ba SUN Movement no atuál Koordenadór Gabinete Apoiu Sosiedade Sivíl, Filipe da Costa, relata katak movimentu globál ne’ebé estabelese iha tinan 2010 ho objetivu atu hadi’a visaun mundu livre hosi hamlaha no má nutrisaun, tanba ne’e Timor-Leste ho kompromisu boot adere ba organizasaun ne’e.

“Governu hakarak anúnsia ofisialmente prontidaun partisipa iha Movimentu SUN hanesan membru, aprezenta esbosu planu multisetorál atu suporta esforsu hotu no konvida parseiru suporta Governu nia esforsu redús má nutrisaun, ho nune’e bele hasa’e oportunidade ekonómika ba timor-oan hotu,” dehan Pontu Fokál ne’e iha seremónia lansamentu adezaun Timor-Leste hanesan membru SUN Movement, iha salaun Ministériu Finansa, Aitarak-laran, tersa ne’e.

Pontu Fokál Timor-Leste ba SUN Movement no atuál Koordenadór Gabinete Apoiu Sosiedade Sivíl GPM, Filipe da Costa. Imajen Tatoli/Egas Cristovão

Tuir reprezentante Governu ne’e, bazeia ba prinsípiu suporta malu entre nasaun membru maka bele hatudu katak ema hotu iha direitu ba ai-han nutrisaun.

“Movimentu SUN rekoñese má nutrisaun iha kauza barak, tanba ne’e presiza partisipasaun ema hotu no programa sira atu serbisu hamutuk hodi tau nutrisaun ba esforsu dezenvolvimentu no implementa solusaun sustentável,” nnia akresenta.

Lidera hosi membru idaidak, movimentu ne’e fó apoiu ba esforsu lideradu hosi Governu rasik no halibur parseiru oioin inklui sosiedade sivíl, ne’ebé la’o ho sistema Nasaun Unida, parseiru dezenvolvimentu, setór privadu, no peskizadór sira atu hadi’ak nutrisaun no seguransa ai-han.

“Nasaun ne’ebé adere ba movimentu ne’e komprometidu ba entendimentu ida katak nutrisaun di’ak nu’udár investimentu di’ak ba jerasaun futuru. Movimentu SUN identifika ona prosesu haat ne’ebé esensiál atu determina alvu nasionál,” nia esplika.

Logotipu lansamento adezaun Timor-leste nian ba SUN Movement, iha salaun Ministériu Finansa, Aitarak-laran, tersa(13/10). Imajen Tatoli/Egas Cristovão

Tanba ne’e, membru sira enkoraja atu aliña esforsu hotu iha nível nasionál ho prosesu sira inklui akompaña progresu iha tempu tuir mai.

Prosesu krítiku ne’e atu halibur parte relevante hotu atubele halo asaun no asegura polítika  konsistente no enkuadramentu legál, aliña asaun ne’ebé relevante ho rezultadu komun inklui akompaña ho finansiamentu no mobilizasaun rekursu.

Iha ajénsia internasionál hamutuk 100 maka apoiu ba SUN Movement no nasaun 61 mak sai membru, ne’ebé Timór-Leste tama iha númeru 62.

Movimentu ne’e mai ho objetivu atubele atinje Objetivu Dezenvolvimentu Sustentável (ODS) 2, nune’e bele hakotu má nutrisaun.

SUN la’ós fundu no la’ós ajénsia ida, maibé hanesan movimentu ho mekanizmu ne’ebé lidera hosi Governu rasik atu halo entidade hotu serbisu hamutuk atubele hadi’a nutrisaun.

Ninia prinsípiu maka serbisu hamutuk ho transparénsia, inkluzividade, bazeia ba diretu, vontade halo negosiasaun, previzilibilidade, efikásia kustu, komunikasaun kontinua, hala’o ho integridade, respeita malu, no la halo a’at ka estraga.

Lansamentu adezaun Timor-Leste ba SUN Movement iha salaun Ministériu Finansa, Aitarak-laran, tersa (13/10). Imajen Tatoli/Egas Cristovão

Hanesan membru SUN, Timor-Leste iha oportunidade atu aprende oinsá nasaun membru sira hadi’a nutrisaun iha sira-nia rain inklui iha oportunidade haree tuir progresu nasaun seluk, iha oportunidade esforsu nasionál, multisetorál no hili prioridade importante hodi atinje ODS 2, nune’e bele utiliza di’ak liután konsellu nasionál seguransa ai-han nutrisaun ne’ebé Governu rasik estabelese ona iha 2012.

Nu’udar membru SUN, iha knaar relata progresu liga ba objetivu movimentu ne’e, ne’ebé sei relata hosi pontu fokál sira no sei partisipa iha reuniaun nasionál no internasionál volutariamente no importante liu maka presiza iha pájina ofisiál ida hodi atualiza progresu.

Seremónia ne’e partisipa hosi membru SUN Movement ne’ebé mai hosi membru Governu relevante sira, sosiedade sivíl no parseiru dezenvolvimentu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here